Atəşkəs elanından sonra Hörmüz boğazında gəmi hərəkəti bərpa olunub, bunu real vaxt rejimində dəniz nəqliyyatını izləyən dünyada aparıcı onlayn xidmət və tətbiq Marine Traffic X platformasında bildirib.
Milli.Az xəbər verir ki, atəşkəs elanından sonra Hörmüz boğazında gəmiçiliyin aktivliyində ilk əlamətlər müşahidə olunur. Danışıqların şərtlərindən biri kimi bu strateji dəniz yolunun müvəqqəti olaraq açılması nəzərdə tutulub.
"Regionda hələ də yüzlərlə gəmi, o cümlədən 426 tanker, mayeləşdirilmiş neft qazı (LPG) daşıyan 34 gəmi və mayeləşdirilmiş təbii qaz (LNG) daşıyan 19 gəmi mövcuddur. Onların bir çoxu əvvəlki fasilələr səbəbindən faktiki olaraq bloklanmış vəziyyətdə idi," - deyə Marine Traffic məlumat yayıb.
Hazırda gəmilərin ilk hərəkətləri qeydə alınır. Belə ki, artıq Hörmüz boğazını Yunanıstanın "NJ Earth" yük gəmisi və Liberiya bayrağı altında üzən "Daytona Beach" gəmisi keçib.
Bununla yanaşı, dünyanın ən böyük gəmiçilik şirkətlərindən biri olan Maersk, Tramp tərəfindən elan edilən atəşkəsə baxmayaraq Hörmüz boğazı üzərindən reysləri bərpa etməyəcəyini bildirib. Şirkət izah edib ki, marşrutun təhlükəsizliyinə dair açıqlamalara inanmır və "ehtiyatlı yanaşma" siyasətini davam etdirəcək.
Qeyd edək ki, fevralın 28-də ABŞ və İsrail İrana qarşı hərbi əməliyyatlara başlayıb. Zərbələr ölkənin ən böyük şəhərlərinə, o cümlədən Tehrana endirilib. Ağ Ev hücumu İslam Respublikasından qaynaqlanan raket və nüvə təhdidləri ilə əsaslandırıb. İrana endirilən zərbələr nəticəsində ölkənin ali rəhbəri ayətullah Əli Xamenei və rəhbərliyin bəzi digər əsas fiqurları həlak olub. İranın İnqilab Keşikçiləri Korpusu İsrailə qarşı genişmiqyaslı cavab əməliyyatı həyata keçirdiyini bəyan edib. İran eyni zamanda ballistik raketlər, qanadlı raketlər və pilotsuz uçuş aparatları ilə ABŞ-nin Bəhreyn, İordaniya, İraq, Qətər, Küveyt, BƏƏ, Oman, Səudiyyə Ərəbistanı və Suriyadakı obyektlərini hədəfə alır.
Münaqişə nəticəsində regionun enerji infrastrukturu və dəniz nəqliyyatı da ciddi risk altına düşüb. Hörmüz boğazı ətrafında təhlükəsizlik gərginliyi səbəbindən dünya bazarında neft qiymətləri kəskin artıb.
Aprelin 7-də ABŞ və İran hərbi eskalasiyanın qarşısını almaq və danışıqlar üçün imkan yaratmaq məqsədilə təxminən iki həftəlik, müvəqqəti atəşkəs barədə razılığa gəliblər Məlumatlara görə, razılaşma Pakistanın vasitəçiliyi ilə əldə edilib. Əsas məqamlardan biri İranın Hörmüz boğazını qlobal gəmiçilik üçün yenidən açmaq öhdəliyidir, eyni zamanda tərəflər hücumları dayandıraraq danışıqlara hazırlaşırlar.
Ayxan
Milli.Az