Yunanıstanın Egey dənizində yerləşən gözoxşayan Siros (Syros) adasında yaşamaq artıq xəyal deyil. Heç bir xüsusi təhsilə və ya böyük maliyyəyə ehtiyac duymadan, sadəcə məsuliyyətli olmaqla bu cənnət məkanda pulsuz yerləşə bilərsiniz.
Milli.Az xəbər verir ki, "Syros Cats" adlı könüllü təşkilatı küçədə yaşayan sahibsiz pişiklərin qayğısına qalacaq yeni könüllülər axtarır. "Syros Cats"ın təklif etdiyi proqram olduqca sadədir.
Könüllülərdən tələb olunanlar bunlardır: Pişiklərə yemək vermək və onların yaşadıqları ərazini təmiz saxlamaq. Xüsusilə bala pişiklərin digər pişiklərlə və insanlarla ünsiyyət qurmasına, yəni "sosiallaşmasına" kömək etmək.
İş həftənin 5 günü, gündəlik cəmi 5 saat davam edir. Qalan vaxtınız isə adanın möhtəşəm çimərliklərini və tarixi yerlərini kəşf etmək üçün tamamilə sizindir.
Bu könüllülük layihəsinin qarşılığında sizə adada pulsuz yaşayış yeri (otaq) və səhər yeməyi təqdim olunur. Xatırladaq ki, adaya gediş-gəliş (yol xərcləri) və şəxsi xərclər könüllünün öz üzərinə düşür.
Sosial mediada sürətlə yayılan bu elan artıq dünyanın müxtəlif ölkələrindən minlərlə heyvansevərin diqqətini çəkib. Siros adasının sakitliyi, Egey dənizinin mənzərəsi və pişiklərin sevgisi ilə dolu olan bu proyekt, "tətil kimi iş" axtaranlar üçün ən ideal variantlardan biridir.
Səkinə Yusifova
Milli.Az