Müasir kiber-cinayətkarlar artıq sadəcə bank hesablarımızı deyil, ən şəxsi məlumatlarımızı - qalereyamızdakı foto və videolarımızı hədəf alırlar. Son dövrlərdə aparılan araşdırmalar göstərir ki, bir çox istifadəçi tamamilə məsum görünən, lakin arxa fonda casusluq edən proqramların qurbanı olur.
Milli.Az xəbər verir ki, xüsusilə "Gözəllik kamerası", "Face swap" (üzdəyişmə) və ya sadə foto-redaktor proqramları quraşdırılarkən istifadəçidən qalereyaya tam giriş icazəsi tələb edir. Bu icazə verildiyi andan etibarən proqram sizin bütün şəxsi arxivinizi kənar serverlərə köçürməyə başlayır və beləliklə, şəkilləriniz şantaj və ya saxta profil yaratmaq məqsədilə bəd niyyətli şəxslərin əlinə keçir.
Təhlükə yalnız foto redaktorlarla məhdudlaşmır; bir çox "pulsuz oyunlar" və ya "fənər" proqramları da əslində gizli bir "troya atı" rolunu oynayır. Bu proqramlar telefonunuza yükləndikdə cihazın isinməsinə və batareyanın sürətlə bitməsinə səbəb olur ki, bu da arxa fonda məlumat transferinin getdiyini göstərən əsas siqnallardan biridir.
Mütəxəssislər xəbərdarlıq edirlər ki, proqram yükləyərkən onun mahiyyətinə uyğun olmayan icazələr istəməsi (məsələn, sadə bir kalkulyatorun şəkillərinizə və ya mikrofona giriş istəməsi) birbaşa təhlükə rəmzidir. Belə hallarda həmin proqramı dərhal silmək və cihazı antivirus skanından keçirmək həyati əhəmiyyət kəsb edir.
Şəxsi təhlükəsizliyinizi qorumaq üçün yalnız "Google Play" və ya "App Store" kimi rəsmi mənbələrdən istifadə etməli, naməlum mənbələrdən gələn APK fayllarından qətiyyən uzaq durmalısınız.
Səkinə Yusifova
Milli.Az