Paxlava sobadan çıxdıqdan sonra tamamilə soyuyubsa, şərbətləmə mərhələsində temperatur balansını düzgün qurmaq lazımdır. Bu, paxlavanın qat-qat strukturunun qalmasına və xəmirə dönməməsinə kömək edir.
Milli.Az xəbər verir ki, soyumuş paxlavaya töküləcək şərbət isti olmalıdır, lakin çox qaynar olmamalıdır. Şərbət hazır olduqdan sonra təxminən 5-10 dəqiqə gözləyib ilk qaynarının çıxmasını təmin etmək ən ideal üsuldur. Çox qaynar şərbət paxlavanın üst qatlarını qəfildən yumşaldıb xəmir edə bilər, çox soyuq şərbət isə qatların içinə tam hopmaya bilər.
Paxlava otaq temperaturuna qədər soyumalıdır. Sobadan çıxdıqdan sonra ən azı 1-2 saat (ideal olaraq daha çox) gözləmək lazımdır. Bu, paxlavanın içindəki yağın və qatların yerinə oturmasını təmin edir. Əgər paxlava hələ də ilıqdırsa və üzərinə isti şərbət tökülsə, o, istənilən çıtırlığı itirəcək.
Şərbəti tökərkən tələsməməli, kəfkir və ya kiçik qabdan istifadə edilməlidir. Prosesə kənarlardan başlayıb, sonra isə mərkəzə doğru hər tərəfə gəzdirərək davam etmək lazımdır. Xüsusilə dilimlərin arasına şərbətin çatması vacibdir ki, daxili qatlar da eyni dərəcədə şirəni çəksin. Şərbəti bir nöqtəyə tökmək bəzi hissələrin quru qalmasına, bəzilərinin isə həddindən çox islanmasına səbəb olar.
Şərbət töküldükdən dərhal sonra servis edilməməlidir. Paxlava ən azı 2-3 saat, ideal olaraq isə 4-6 saat dincəlməlidir. Bu müddət ərzində şərbət qatlara yavaş-yavaş hopur və paxlavanın daxili teksturası formalaşır. Dinlənmə müddətində paxlavanın üstü bağlanmamalıdır, otaq temperaturunda açıq şəkildə qalmalıdır ki, buxar yaranmasın və çıtırlıq qorunsun.
Lalə Qüdrətova
Milli.Az