Çay Azərbaycanda səhər yeməyindən axşam söhbətlərinə qədər hər süfrədə özünə yer tapır. Lakin iş dəmləməyə gəldikdə fikirlər müxtəlifləşir. İllərdir davam edən "isti su, yoxsa soyuq su?" müzakirəsi yenidən aktuallaşıb.
Milli.Az xəbər verir ki, çay yarpaqlarının rəngi və qoxusu yüksək temperatur sayəsində suya keçir. Buna görə də klassik dəmləmə üsulunda qaynar suyun istifadəsi əvəzolunmaz hesab olunur. Temperatur artdıqca çayın tərkibindəki tanninlər və aromatik komponentlər daha sürətlə həll olur, nəticədə daha tünd rəngli və intensiv dadlı çay alınır.
Lakin dəmliyə qoyulan çayın üzərinə birbaşa qaynar su tökülmür. Öncə az miqdarda ilıq və ya soyuq su əlavə edilərək çay yarpaqları yüngülcə "oyadılır". Ardınca qaynar su əlavə edilir.
Bu kiçik addım yarpaqların qəfildən yanmasının qarşısını alır və ləzzətin daha balanslı paylanmasını təmin edir. Nəticədə nə acı, nə də dadsız, içimi yumşaq və rəngi yerində bir çay alınır.
"Dovşan qanı" çayın sirri: Səbir və Balans
Yaxşı çay üçün təkcə temperatur kifayət deyil. Dəmləmə müddəti və üsulu da su qədər həlledicidir:
Çay adətən 15-20 dəqiqə arasında dəmlənir. Vaxt az olarsa çay açıq rəngli qalar, çox uzanarsa acılaşar.
Alt çaydanda suyun davamlı qaynar qalması vacibdir. Üst dəmlikdəki çay altdan gələn buxar sayəsində tələsmədən, yavaş-yavaş dəmlənir.
Dəmləmə zamanı qapağı tez-tez açıb-bağlamaq və ya çayı qarışdırmaq prosesi pozur. Ustalar dəmliyi ocağa qoyduqdan sonra ona toxunmamağı məsləhət görürlər.
Mükəmməl çay üçün qısa xülasə:
Dəmliyə quru çayı qoyun.
Üzərinə çox az (bir neçə damcı) soyuq su gəzdirin (yarpaqları isladın).
Qaynar suyu yavaşca əlavə edin.
Aşağı odda, altdakı suyun buxarı ilə 20 dəqiqə gözləyin.
Lalə Qüdrətova
Milli.Az