Böyük Britaniyada təbii qaz ehtiyatları kritik səviyyəyə düşüb. Anbarlardakı mövcud qazın ölkəyə cəmi 1,5-2 gün kifayət edəcəyi bildirilir. Qiymətlər artıq Avropa ortalamasını keçib və hökumətə təcili yeni anbarların tikilməsi ilə bağlı çağırışlar edilir.
Milli.Az xəbər verir ki, Böyük Britaniyanın qaz ötürücü operatoru National Gas tərəfindən yayımlanan məlumatlara görə, ölkənin qaz anbarlarındakı enerji miqdarı keçən il 18 min GWh olduğu halda, bu il cəmi 6.700 GWh-ə qədər geriləyib. Maye qaz (LNG) terminallarındakı doluluq nisbəti də olduqca aşağı səviyyədədir.
Anbar tutumunun məhdud olması ölkəni xarici mənbələrdən, xüsusilə ABŞ və Norveçdən asılı vəziyyətə salıb. Argus Media eksperti Natasha Fielding bildirir ki, Böyük Britaniyada qazın qiyməti Avropanın istinad nöqtəsi sayılan Hollandiya bazarını da üstələyib. Bu bahalaşmanın may ayının sonuna qədər davam edəcəyi proqnozlaşdırılır.
National Gas şirkətinin baş direktoru Jon Butterworth Enerji naziri Ed Milibanda göndərdiyi hesabatda sistemin təhlükəsiz işləməsi üçün 3 yeni qaz anbarının tikilməsini və ya 6 böyük LNG gəmisinin dövriyyəyə salınmasını tələb edib. Qeyd olunur ki, hazırkı tutum əvvəlki illərlə müqayisədə cəmi 18% təşkil edir.
Goldman Sachs investisiya bankının analitikləri xəbərdarlıq edirlər ki, Yaxın Şərqdəki gərginlik səbəbindən yarana biləcək enerji şoku 2022-ci ildəki Rusiya böhranından 17 dəfə daha böyük ola bilər. Mövcud vəziyyət davam edərsə, neftin qiymətinin gələn həftə 100 dolları keçəcəyi gözlənilir.
Lalə Qüdrətova
Milli.Az