İordaniyanın antik Petra şəhərində aparılan qazıntılar Nabatilər Krallığının paytaxtı olan bu şəhərin su infrastrukturunun düşündüyümüzdən qat-qat mürəkkəb olduğunu sübut etdi. Yeni tapıntılar antik mühəndislik dərsliklərini yenidən yazdıra bilər.
Milli.Az xəbər verir ki, əvvəllər "Ain Braq" su kəmərinin yalnız bir xətlə işlədiyi düşünülürdü. Lakin Niklas Junqmannın rəhbərliyi ilə aparılan araşdırmalar şəhərə su daşıyan ikinci bir ana xəttin varlığını üzə çıxarıb.
Birinci xətt bişmiş torpaqdan (terrakota) hazırlansa da, yeni kəşf edilən 116 metr uzunluğundakı ikinci xətt qurğuşun borulardan ibarətdir. Bu boruların məhlulla bərkidilməsi və qaynaq edilməsi o dövr üçün yüksək texnologiya hesab olunur.
Mütəxəssislər bildirirlər ki, bu xətt təzyiqlə işləyən "tərs sifon" mexanizmi ilə qurulub. Bu sistem sayəsində su relyefdəki maneələrin altından keçirilərək az-Zantur təpəsindəki rezervuarlara (su anbarlarına) çatdırılırdı.
Bu kəşf Nabatilərin su idarəçiliyi sahəsindəki qabiliyyətini yenidən gündəmə gətirdi. Onlar hamamları, bağları və məbədləri su ilə təmin etmək üçün çölün ortasında kəsilməz bir təzyiq xətti yaratmağı bacarıblar.
Lalə Qüdrətova
Milli.Az