Son günlər Azərbaycanın informasiya məkanında baş verən qalmaqallar, dezinformasiya axını və hibrid təhdidlər ölkə gündəminin əsas mövzusuna çevrilib.
Milli.Az "Бакинский Бурила" Teleqram kanalına istinadla bildirir ki, analitik mərkəzlər və media kanalları Azərbaycana qarşı genişmiqyaslı hibrid hücumun başladığını, izlərin isə birbaşa Moskvaya gedib çıxdığını bildirirlər. Lakin bu prosesdə iki mühüm məqamı diqqətdən qaçırmaq olmaz.
Bu, hücum deyil, uzunmüddətli müharibədir
Birincisi, baş verənlər bu gün başlamayıb. Bu, sadəcə növbəti bir hücum deyil, uzun müddətdir davam edən sistemli, hibrid və təbliğat müharibəsidir. İkincisi, Azərbaycan öz qərarlarında nə qədər güclü və müstəqil olarsa, Bakıya "çirkli" yollarla təzyiq göstərmək istəyənlərin sayı da bir o qədər artacaq.
AZAL təyyarəsi böhranı və "müstəmləkəçi" yanaşma
Azərbaycan-Rusiya münasibətlərindəki mövcud böhranın kökləri daha dərindir. AZAL təyyarəsi ilə bağlı baş verən hadisə bir tətikləyici rolunu oynadı. Bundan sonra Moskvanın Bakıya qarşı praqmatik deyil, daha çox "sovet tipli" və "müstəmləkəçi" münasibəti hər gün özünü büruzə verməyə başladı. Sərnişin təyyarəsinin vurulması əmrini verən şəxsə qarşı cinayət işinin xitam verilməsi, heç bir cəza və kompensasiyanın olmaması Moskvanın bu hadisənin "unudulacağını" gözlədiyini göstərirdi.
Bakının cavab addımları və Moskvanın "incikliyi"
Lakin rəsmi Bakı bu vəziyyətlə barışmadı. Azərbaycanın xarici siyasətdəki uğurları Moskvanı bir-birinin ardınca "sürprizlərlə" üz-üzə qoydu:
Əbu-Dabidəki İlham Əliyev-Paşinyan görüşləri;
TRIPP layihəsi və Vaşinqtonda sülh sazişinin paraflanması;
Azərbaycan-ABŞ münasibətlərinin möhkəmlənməsi və İlham Əliyevlə Donald Tramp arasındakı yaxın şəxsi təmaslar.
Cey Di Vensin bölgəyə səfəri isə Moskvanın siyasi ambisiyalarına vurulan növbəti zərbə oldu.
Separatizmin sonu: Vardanyan və digərləri
"SSRİ-ni bərpa etmək" xəyalı ilə yaşayanlar üçün ən ağır zərbələr isə son dövrlərdə gəldi. Moskvadan Qarabağa göndərilən Ruben Vardanyanın 20 illik həbs cəzası alması və bu gün Vaşinqtonda keçirilən Sülh Şurasının sammitində Azərbaycan Prezidentinin iştirakı rəsmi Bakının qətiyyətini nümayiş etdirir.
Analitiklər Rusiyanın Cənubi Qafqazdan "sıxışdırılıb çıxarıldığını" desələr də, əslində Rusiya öz davranışı, hərəkətləri və müstəmləkəçi yanaşması ilə özü-özünü bölgədən kənarlaşdırdı. İndi nə 30-cu, nə də 90-cı illərdir; dünya da, Azərbaycan da artıq çox fərqlidir.
Hibrid hücumun Avropa cəbhəsi
Rusiya Bakıdakı təsir rıçaqlarını (məsələn, "Sputnik" və "Rus evi" kimi mərkəzlərin fəaliyyətinin dayandırılması) itirdikdən sonra hibrid müharibəni Avropaya daşıyıb. Hazırda AŞPA-da, Brüsseldəki müəyyən siyasi dairələr və Almaniya kimi ölkələrdə yaşayan "radikal müxalifət" qrupları vasitəsilə Azərbaycana qarşı eyni vaxtda koordinasiya edilmiş hücumlar həyata keçirilir.
Milli.Az