Bu, ləyaqət, zadəganlıq və ali missiyanın rəmzi olan kral bənövşəyi çaları altında keçən bir axşam idi. Smokinq və klassik kostyumlarda bəylər, zərif gecə libaslarında xanımlar yüksək dünyəvi estetika ab-havası yaradırdılar. Lakin bu gecə təkcə dəbdəbəni nümayiş etdirmək üçün deyil, həm də bir həqiqəti xatırlatmaq üçün idi: əsl zəriflik mərhəmətdən başlayır.
Fairmont Baku Flame Towers otelində Vyana Xeyriyyə Balı - mövsümün beynəlxalq dünyəvi hadisəsi baş tutdu. Tədbir yenidən Avropa ənənələrini, Azərbaycan koloritini, beynəlxalq biznes-netvorkinqi və xeyriyyəçilik missiyasını bir araya gətirdi.
Bayram axşamı The One in a Million beynəlxalq biznes-klubu tərəfindən, həmtəsisçi Svetlana Tretyakovanın rəhbərliyi ilə təşkil olunub. Bakıda təşkilati tərəfdaş qismində Lidiya Əliyeva-Şestak çıxış edib.
Xəzər sahilində keçirilən Vyana balı haqlı olaraq Azərbaycanda Avropa mədəniyyətinin brilyantı adlandırılır. İllər ərzində bu tədbir yumşaq diplomatiya formatına çevrilərək müxtəlif ölkələrin nümayəndələri, mədəni elita və işgüzar dairələr arasında dialoq məkanına çevrilib. Burada incəsənət ümumbəşəri anlaşma dili rolunu oynayır.
Vyana balları ənənəsi dünya mədəni fenomeni kimi tanınaraq UNESCO tərəfindən qeyri-maddi mədəni irs siyahısına daxil edilib. Bu axşam klassik musiqi sədaları altında European Azerbaijan School şagirdləri XIX əsrin ruhunu yaşadaraq səhnədə parladılar və mədəni dəyərlərin varisliyini nümayiş etdirdilər. Onların zərif çıxışları ənənə ilə müasirliyin harmoniyasını təcəssüm etdirdi.
Musiqili ab-havanı Bakı Kamera Orkestri IMEC formalaşdırdı. Axşamın ən yaddaqalan məqamlarından biri Azərbaycanın Əməkdar artisti, opera ifaçısı İnara Babayevanın çıxışı oldu - o, güclü səsi və səhnə xarizması ilə qonaqları valeh etdi. Gecənin incisi isə Ajouré Atelier tərəfindən təqdim olunan fəşn-şou oldu - Avropa klassikası ilə müasir yüksək modanın vəhdətini əks etdirən zərif kolleksiya böyük maraq doğurdu.
Axşama xüsusi çalar qatan məqamlardan biri caz pianoçusu, bəstəkar və müğənni Leyla Noir-in çıxışı idi. Onun musiqi proqramını beynəlxalq müsabiqələr laureatları Lenay Seyidalizadə və Aleksey Anpilovun ifasında Argentina tanqosu tamamladı. Tanqo ritmində peşəkarlar və həvəskarlar bir araya gələrək rəqs sənətinin gözəlliyini nümayiş etdirdilər. Canlı musiqi, vokal və plastika təsirli səhnə performansında birləşdi.
Dünyəvi proqram çərçivəsində rəssam və ictimai xadim Milena Nəbiyevanın mini-sərgisi də təqdim olundu və gecəyə bədii dərinlik qatdı. Axşamın aparıcısı Azərbaycanın Əməkdar jurnalisti Emin Musavi oldu və tədbirə xüsusi təntənə və dinamika verdi.
Qonaqları tərəfdaşların hədiyyə tirajı, xeyriyyə auksionu və zərif qala-şam yeməyi gözləyirdi. Axşamın əsas missiyası xeyriyyəçilik idi - toplanan bütün vəsait valideyn himayəsindən məhrum olmuş uşaqların dəstəklənməsinə yönəldiləcək. Bal bir daha sübut etdi ki, prestij və xeyirxahlıq ayrılmaz anlayışlardır.
Tədbirin tarixində ilk dəfə olaraq Vienna Charity Ball Awards xüsusi mükafatının təqdimetmə mərasimi keçirildi. Mükafatlar peşəkar fəaliyyəti və ictimai mövqeyi ilə mədəni və xeyriyyə təşəbbüslərini dəstəkləyən şirkət və şəxslərə təqdim olundu. Təşkilatçılar əmindirlər ki, bu ənənə hər il davam edəcək.
2026-cı il Vyana Xeyriyyə Balının səfiri NAC Neo-Global Arts & Connections-in təsisçisi Nigar Babayeva seçilib.
Ənənəyə uyğun olaraq təşkilat komitəsi axşamın şahzadə və şahzadəsini də müəyyən edir. Bu il fəxri titullar Ruslan Urban və Turay Kərəmliyə təqdim olunub.
Gecənin sonunda daha bir gözəl ənənə - balın kral və kraliçasının seçimi baş tutdu. Fəxri kraliça titulu Milena Nəbiyevaya, kral titulu isə European Azerbaijan School rəhbəri Françesko Bankiniyə təqdim olundu.
Bir ildən sonra Bakıda keçiriləcək Vyana Xeyriyyə Balında yenidən görüşmək ümidi ilə.
Vyana Xeyriyyə Balı - prestijin həqiqətən məna qazandığı məkan.
Milli.Az