Balıq alarkən çox vaxt "gözləri parlaqdırsa, təzədir" deyib keçirik. Lakin peşəkar balıqçılar bildirirlər ki, hiyləgər satıcılar bəzən balığın gözlərinə su çiləyərək onu parlaq göstərə bilərlər. Əsl təzəlik testi balığın qəlsəmələrində və ətinin elastikliyində gizlənir.
Milli.Az xəbər verir ki, balıqçıların ilk baxdığı yer balığın qəlsəmələridir.
Təzə balığın qəlsəmələri canlı, parlaq qırmızı və ya çəhrayı rəngdə olmalıdır.
Əgər qəlsəmələr tündləşibsə, qəhvəyi rəngə çalırsa və ya üzərində yapışqan bir selik varsa, həmin balıq bayatdır.
Gözlər aldadıcı ola bilər, amma diqqətlə baxdıqda həqiqəti deyir.
Göz bəbəkləri qara, ətrafı şəffaf və gözlər çölə doğru qabarıq olmalıdır.
Gözlər içəri çökübsə və ya üzərində dumanlı, buludlu bir təbəqə varsa, o balıqdan uzaq durun.
"Barmaq" testi - Balığın gövdəsinə barmağınızla yüngülcə basın.
Əgər barmağınızın yeri dərhal geri qayıdırsa və ət bərkdirsə, balıq təzədir. Barmağınızın izi çuxur kimi qalırsa, bu, balığın hüceyrə quruluşunun pozulduğunu (bayatladığını) göstərir.
Təzə balığın pulları gövdəsinə möhkəm yapışmış olur və əlinizi sürtdükdə asanlıqla tökülmür. Həmçinin, gövdəsi parlaq və canlı görünür.
Balığı əlinizlə dik tutduqda quyruğu aşağı sallanmamalı, dik durmalıdır. Sallanan quyruq balığın yumşaldığına işarədir.
Təzə balıq ağır, narahatçılıq yaradan "balıq qoxusu" verməz. O, sadəcə dəniz və yosun qoxmalıdır. Əgər kəskin amonyak qoxusu hiss edirsinizsə, bu, balığın xarab olmağa başladığının göstəricisidir.
Lalə Qüdrətova
Milli.Az