Hamımız bilirik ki, kiçik düymə az su, böyük düymə isə çox su boşaldır. Lakin bu sistemin arxasında həm mexaniki bir zərurət, həm də ətraf mühiti qoruyan mühüm bir mühəndislik həlli dayanır.
Milli.Az xəbər verir ki, ikiqat düymə sistemi təkcə suyun miqdarını deyil, həm də onun təzyiqini tənzimləyir.
Kiçik düymə: Təxminən 3 litr su boşaldır. Bu, maye tullantıların təmizlənməsi üçün kifayət edən minimum təzyiqi yaradır.
Böyük düymə: 6-dan 9 litrə qədər su boşaldır. Burada əsas məqsəd daha ağır tullantıları borulardan itələmək üçün lazım olan yüksək hidrostatik təzyiqi və vakuum effektini yaratmaqdır.
Əgər hər zaman az su istifadə olunarsa, kanalizasiya borularında çöküntülər yarana və zamanla tıxanmalara səbəb ola bilər. Böyük düymənin funksiyası həm də boruları "yuyaraq" tam təmizləməkdir.
Bu sistemin içində iki fərqli qapaq və ya pilləli klapan mövcuddur. Düyməyə basanda:
Kiçik düymə klapanın yalnız bir hissəsini açaraq suyun yarısını buraxır.
Böyük düymə bütün qapağı açaraq rezervuardakı suyun hamısının sürətlə boşalmasını təmin edir.
Araşdırmalar göstərir ki, ikiqat sifon sistemi olan evlərdə su istehlakı 67%-ə qədər azalır. Bu, həm su pullarının azalmasına, həm də qlobal su qıtlığı ilə mübarizəyə böyük töhfə verir. Bu sistem ilk dəfə 1980-ci illərdə Avstraliyada su qıtlığına qarşı bir həll yolu kimi ixtira edilib.
Lalə Qüdrətova
Milli.Az