Fransız mətbəxinin klassiklərindən sayılan soğan şorbası, əslində çox sadə məhsullardan hazırlanır. Bu şorbanın dadının sirri soğanın bişirilmə texnikasındadır. Düzgün üsulla karamelizə olunmuş soğan şorbaya həm tünd rəng, həm də təbii bir şirinlik qatır.
Milli.Az xəbər verir ki, mükəmməl nəticə üçün bu addımları izləməlisiniz:
Şorba üçün soğanlar aypara formasında və çox nazik doğranmalıdır. Bu, soğanların bərabər şəkildə bişməsini və ağızda yumşaq bir toxuma buraxmasını təmin edir.
Bu reseptin ən vacib nöqtəsi soğanları yandırmadan qovurmaqdır. Kərə yağı və çox az duru yağda, aşağı odda soğanlar rəngini tamamilə qəhvəyi edənə qədər (təxminən 30-40 dəqiqə) qovrulmalıdır. Soğanlar nə qədər yaxşı karamelizə olsa, şorbanın dadı bir o qədər dərin olar.
Soğanlar istənilən rəngi aldıqdan sonra bir xörək qaşığı un əlavə edilib qovrulur. Daha sonra üzərinə ət və ya toyuq bulyonu yavaş-yavaş əlavə edilir. Əgər varsa, bulyonun içərisinə bir ədəd dəfnə yarpağı atmaq ətri daha da gözəlləşdirir.
Klassik soğan şorbası oda davamlı qablarda servis edilir. Şorbanın üzərinə bir dilim qızardılmış çörək və bol miqdarda rəndələnmiş kaşar (və ya qruyer) pendiri qoyulur. Qablar sobaya verilir və pendir qızarana qədər gözlənilir.
Lalə Qüdrətova
Milli.Az