Havanın sürətlə soyuması ilə təbii qaz sərfiyyatı da ciddi şəkildə yüksəlir. Bir çox evdə kombilər fasiləsiz işləyir və bu da ailə büdcələrinə əlavə yük yaradır.
Milli.Az xəbər verir ki, bir neçə sadə addımla həm evi komfortlu şəkildə isidib, həm də xərclərə qənaət etmək mümkündür.
1. Kombini tez-tez açıb-söndürmək daha çox qaz yandırır
Ən çox edilən səhvlərdən biri kombinin gün ərzində tez-tez söndürülüb yenidən işə salınmasıdır. Kombi tam söndürüldükdə sistemdəki su soyuyur və yenidən qızdırmaq daha çox enerji tələb edir. Əgər cihaz bir neçə saat ərzində yenidən lazım olacaqsa, onu aşağı rejimdə işlək vəziyyətdə saxlamaq daha qənaətlidir.
2. İllik texniki baxım və baca təmizliyi mütləq olmalıdır
Kombilərin səmərəli və təhlükəsiz işləməsi üçün ildə bir dəfə texniki baxımdan keçirilməsi vacibdir. Baca və kombi təmizliyi həm zəhərlənmə riskini azaldır, həm də sərfiyyatı təxminən 30% aşağı sala bilir.
3. İstilik izolyasiyası xərcləri yarıya qədər azalda bilər
Evlərdə istilik itkisi əsasən pəncərə və divarlardan baş verir. Yaxşı izolyasiya və mantolama ilə təbii qaz xərclərini 50-70% azaltmaq mümkündür. İstilik izolyasiyası olmayan evlərdə enerji itkisi daha yüksək olur.
4. Mərkəzi istilik sistemlərində istilik ölçən qurğular üstünlük yaradır
Mərkəzi sistemlə qızdırılan binalarda bəzi sakinlər istifadə etmədikləri istiliyə görə də pul ödəyirlər. İstilik ölçən (payölçər) sistemi ilə hər kəs yalnız istifadə etdiyi istiliyə uyğun ödəniş edir və 40%-ə qədər qənaət əldə etmək olur.
5. Pərdələrdən düzgün istifadə istilik itkisini azaldır
Evdə istilik itkisinə ən çox səbəb pəncərələrdir. Qalın pərdələrdən istifadə istilik itkisini 25%-ə qədər azaldır. Lakin radiatoru tam örtən uzun pərdələr istiliyin otağa yayılmasına mane olur. Gün ərzində günəş işığını içəri buraxmaq, axşam isə qalın pərdələri bağlamaq daha çox enerji qənaəti yaradır.
6. Radiatorların havası mütəmadi olaraq alınmalıdır
Radiatorlarda hava toplanması istilik verimliliyini azaldır. Alt hissəsi isti, yuxarı hissəsi soyuq olan radiatorların havası mütləq boşaldılmalıdır. Bu, həm daha sürətli isinmə yaradır, həm də enerjiyə qənaət edir.
7. Radiatorların önü və üstü bağlanmamalıdır
Radiatorların önünə mebel qoymaq və ya üzərinə əşya asmaq isti havanın dövranını əngəlləyir. Radiatorun arxa səthinə izolyasiya lövhəsi yerləşdirmək isə istilik itkisini minimuma endirir və daha səmərəli isitmə təmin edir.
8. Hamam və mətbəxdə kiçik tədbirlər böyük qənaət yaradır
Qısa müddətli duş almaq, isti suyu gərəksiz yerə açıq qoymamaq və qabları makinedə yumaq qaz sərfiyyatının azalmasına kömək edir. Gündəlik vərdişlərdə edilən kiçik dəyişikliklər belə xərclərdə nəzərəçarpacaq azalma yaradır.
9. Pəncərələrdə cüt şüşə və izolyasiya lenti istifadə edilməlidir
Tək şüşəli pəncərələr yüksək istilik itkisinə səbəb olur. Cüt şüşə istifadə etmək və pəncərə boşluqlarını izolyasiya lentləri və ya süngərlə bağlamaq isti havanın içəridə qalmasına şərait yaradır. Qapı altlıqlarının bağlanması da mühüm addımlardandır.
10. Yalnız bir otağı isitmək doğru deyil
Tək otağı isitmək qonşu otaqlarda enerji itkisinə və daha çox sərfiyyata səbəb olur. Mütəxəssislər bütün evin balanslı şəkildə qızdırılmasını daha qənaətli hesab edir.
Təhlükəsiz təbii qaz istifadəsi üçün 9 vacib qayda
Qış aylarında təhlükəsizlik ən az qənaət qədər əhəmiyyətlidir. Mütəxəssislər istifadəçilərə xüsusilə aşağıdakı məqamlara diqqət etməyi tövsiyə edir:
1. Qaz açma əməliyyatları mütləq paylayıcı şirkətin nəzarətində aparılmalıdır.
İlk dəfə qoşulma, qaz açma və müqavilə yeniləmə yalnız rəsmi nəzarətlə həyata keçirilməlidir. Cihazların işə düşməsi səlahiyyətli servis tərəfindən edilməlidir.
2. Köhnəlmiş bağlantı avadanlıqları dəyişdirilməlidir.
Aşınmış və istifadə müddəti bitmiş avadanlıqlar sertifikatlı mütəxəssislər tərəfindən yoxlanmalı və lazım gəldikdə yenilənməlidir.
3. Bacalar açıq havaya yönəldilmiş olmalıdır.
Baca borularının açıq havaya çıxması, menfezlərin bağlı qalmaması və sızdırmazlıq yoxlaması həyati əhəmiyyət daşıyır. Xüsusilə qışda boruların çöldə olan hissələrində buzlanma riski var.
4. Yalnız səlahiyyətli şəxslər müdaxilə etməlidir.
Qaz xəttinə qeyri-peşəkarların müdaxiləsi ciddi təhlükə yaradır. Bütün görülən işlərin sənədləri istifadəçiyə təqdim edilməlidir.
5. Bacalı cihazlar uyğun olmayan yerlərdə istifadə olunmamalıdır.
Bacalı cihazların yataq otağı, hamam və tualetdə istifadə olunması qadağandır. Bu cihazlarla birlikdə karbonmonoksit detektoru mütləq olmalıdır.
6. İcazəsiz qazıntı işləri aparılmamalıdır.
Qaz xətti olan ərazilərdə edilən hər cür qazıntı işinə paylayıcı şirkətdən icazə alınmalıdır.
7. Cihazların periyodik baxımı gecikdirilməməlidir.
Daimi texniki baxım həm təhlükəsizliyi artırır, həm də cihazın verimli işləməsinə şərait yaradır.
Lalə Qüdrətova
Milli.Az