M.Maqomayev adına Azərbaycan Dövlət Akademik Filarmoniyasında "Bir Millət, İki Dövlət" adlı möhtəşəm konsert proqramı baş tutub. Azərbaycan və Türkiyə arasında sarsılmaz qardaşlıq və mədəni birlik münasibətlərinə həsr olunmuş tədbir hər iki ölkənin ictimaiyyət nümayəndələrinin iştirakı ilə keçirilib.
Tədbir şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Daha sonra Azərbaycan Respublikasının və Türkiyə Cümhuriyyətinin Dövlət Himnləri səsləndirilib.
Konsert proqramından əvvəl tədbirdə Türkiyə Respublikasının Azərbaycandakı Fövqəladə və Səlahiyyətli səfiri Birol Akgün, Xaricdə yaşayan Türklər və Qohum Topluluqları İdarəsinin sədri Abdulhadi Turus, Ankara Elazığ Mədəniyyət və Tanıtma Fondunun sədri, professor Kadirhan Süngüroğlu çıxış edərək iki ölkə arasındakı mədəni əməkdaşlığın önəmini vurğulayıblar.
Konsertdə Ü.Hacıbəyli adına Azərbaycan Dövlət Simfonik Orkestri (dünyaşöhrətli dirijor Bujor Hoinic və Azərbaycan dirijoru Mustafa Mehmandarovun rəhbərliyi ilə) və solistlər Zeynep Halvaşi (mezzo-soprano), Feryal Türkoğlu (soprano), Aydın Uştuk (tenor), Mehmet Yılmaz (bas-bariton) və Turgay Coşkun (qanun) çıxış ediblər.
Proqramda Bujor Hoinic "Harput" simfonik poeması (10 hissədə), Niyazi "Türk marşı", Azərbaycan xalq mahnısı "Sarı gəlin", Ü.Hacıbəyli "Çırpınırdın Qara dəniz", Niyazi "Qaytağı" səslənib.
Konsertin sonunda Elazığ Mədəniyyət və Tanıtma Fondu tərəfindən hər iki dirijora xüsusi hədiyyələr təqdim edilib.
Azərbaycan və Türkiyə mədəniyyət xadimlərinin birlikdə təşkil etdiyi bu möhtəşəm konsert proqramı dostluq və qardaşlığımızın rəmzi olaraq dinləyicilərə unudulmaz musiqi gecəsi bəxş etdi.
İnformasiya dəstəyi - Trend.Az, Day.Az, Milli.Az