Cənubi Afrikadan gələn bu bənövşəyi çiçəkli bitki təkcə gözəlliyi ilə deyil, həm də təbii qoruyucu təsiri ilə seçilir. Onu bağınıza bir dəfə əksəniz nə ilan, nə də siçan həmin yerə yaxınlaşmayacaq.
Milli.Az xəbər verir ki, payızın gəlişi ilə bağlarda yeni mövsüm başlayır. Yaydan qalan bitkilər solur, torpaq yenidən nəfəs almağa hazırlaşır. Lakin bu dövrdə ilan, siçan və torpaq gəmiriciləri kimi arzuolunmaz canlılar da görünə bilər. Bu zaman köməyə Tulbagia purpurea, yəni Afrika sarımsağı gəlir.
Zərif bənövşəyi çiçəkləri ilə həm dekorativ görünən bu bitki, eyni zamanda təbii həşərat və gəmirici uzaqlaşdırıcı xüsusiyyətə malikdir. Özünəməxsus kəskin qoxusu sayəsində kimyəvi dərmanlara ehtiyac olmadan bağınızı qoruyur.
Tulbagia purpurea - Cənubi Afrika mənşəli, çoxillik bitkidir. Təbii şəraitində 1 metrə qədər böyüyə bilir, lakin Azərbaycan iqlimində orta hesabla 30 sm hündürlüyə çatır.
Bitkinin yaydığı qoxu ilanları, siçanları və torpaq gəmiricilərini uzaqlaşdırır. Onlara zərər vermir, sadəcə qoxusu ilə yaxınlaşmalarına mane olur - yəni təbiyyətin özü tərəfindən yaradılmış zərif bir müdafiə sistemi kimi işləyir.
Bağbanların sözlərinə görə: "Tulbagia bağ üçün təbii qoruyucu səddir. İnsanlar onun qoxusunu güclü hiss etmir, amma zərərvericilər ondan qaçır."
Tulbagia günəşi sevir, amma yarımkölgədə də böyüyür. Quraqlığa davamlıdır və qış aylarında da yaşaya bilir. Aprel ayında 5-15 sm aralıqlarla əkildikdə, yay boyunca çiçək açır. Az miqdarda gübrə əlavə edildikdə həm tez kök atır, həm də qoxusu güclənir.
Bitkini yalnız bağda deyil, dibçəkdə də yetişdirmək mümkündür.
Afrika sarımsağı son illərdə Avropada ən çox seçilən təbii zərərvericiqovucu bitkilərdən birinə çevrilib.
Bir dəfə əkildikdən sonra, hər yaz yenidən çıxır və illərlə bağınızı qorumağa davam edir.
Lalə Qüdrətova
Milli.Az