Qadınlarda hormonal pozğunluğun əlamətləri açıqlanıb.
Milli.Az xəbər verir ki, endokrinoloq Alina Alkasheva bildirib ki, hormonal pozğunluq orqanizmdə hormonların istehsalının pozulmasıdır və bu həm artıq, həm də azlıq şəklində özünü göstərə bilər.
"Bu vəziyyət adətən qalxanabənzər vəzi, böyrəküstü vəzin, hipofiz, yumurtalıqlar və pankreas kimi hormon istehsal edən orqanların funksiyasının pozulması ilə bağlı yaranır. Bundan əlavə, stress, xroniki yorğunluq, nizamsız qidalanma, zərərli vərdişlər və fiziki aktivliyin azlığı da əhəmiyyətli rol oynayır.
Ən çox rast gəlinən əlamətlər arasında ani çəki dəyişiklikləri, izah edilməyən arıqlama və ya sürətli çəki artımı, menstrual dövrdə pozğunluq, cinsi istəksizlik, yuxu problemləri, gündüz yuxululuğu və səbəbsiz əhval dəyişikləri yer alır. Həmçinin, üz, döş, bel və qarın nahiyəsində artıq tüklənmə (girsutizm) müşahidə oluna bilər".
Alkasheva xəbərdarlıq edir ki, hormonal pozğunluqlar reproduktiv sağlamlıq üçün ciddi fəsadlara səbəb ola bilər. Ən çox rast gəlinən ağırlaşmalar isə xüsusən vaxtında müalicə edilmədikdə sonsuzluq və hamiləliyin davam etməməsidir.
Mütəxəssis vurğulayır ki, hormonal pozğunluğun qarşısını almaq üçün balanslı qidalanma, kifayət qədər yuxu, müntəzəm fiziki aktivlik və emosional vəziyyətin idarəsi vacibdir. Bundan əlavə, ginekoloq və endokrinoloq tərəfindən profilaktik müayinələr keçirmək erkən pozğunluqları aşkar etməyə və düzəltməyə imkan verir.
İsmayıl
Milli.Az