Masazırdan şəhər istiqamətinə fəaliyyət göstərən 525 nömrəli avtobusun gec gəlməsi sakinləri narahat edir. Sərnişinlər tək avtobuslardan yox, sürücülərdən də şikayətcildirlər.
Milli.Az xəbər verir ki, sakinlərin sözlərinə görə, onlar yeni avtobuslarla yanaşı köhnə avtobuslardan da istifadə edirlər:
"Avtobuslar çox gec gəlir. Gözümüz yollarda qalır. Gələndə isə çox sıxlıq olur".
Sərnişinlər həmçinin iddia edirlər ki, sürücülər onlarla pis rəftar edirlər:
"Davranışları çox kobuddur. Bəzən elə olur ki, sükan arxasında siqaret çəkirlər".
Sürücülər isə deyilənlərlə razılaşmırlar. Sürücülər də sərnişinlərdən şikayətcildirlər:
"Kamera önündə siqaret çəkmək nədir? Yalan ifadədədir. Bizimlə əksinə kobud davranırlar. Bildiririk avtobusda ön qapı önündə durmayın, amma onlar bizə qulaq asmırlar".
Məsələ ilə bağlı AYNA-dan bildirildi ki, 525 nömrəli marşrut xəttində 22 avtobus 6-7 dəqiqə intervalı ilə sərnişinlərə xidmət edirlər. Marşrutun keçdiyi küçə və prospektlərdə günün pik saatlarında tıxac olur. 2025-ci ildə 525 nömrəli avtobuslar yenilənib, digərlərinin də yenilənməsi nəzərdə tutulub.
Asya
Milli.Az