Xəbər verdiyimiz kimi, sentyabrın 22-də Azərbaycan Respublikasının Prezidenti İlham Əliyev BMT Baş Assambleyasının 80-ci sessiyasında iştirak etmək məqsədilə Nyu-Yorka işgüzar səfər edib. Səfər çərçivəsində Cənab Prezident dünyanın alternativ investisiyalar sahəsində aparıcı şirkətlərindən olan "Brookfield Asset Management", "Neuberger Berman" və "Blackstone" ilə görüşüb.
Hər üç şirkət qlobal maliyyə bazarının aparıcı qurumlarıdır və onların təşəbbüsü ilə keçirilən bu görüşlər Azərbaycanın beynəlxalq investisiya cəlbediciliyinin göstəricisidir. Bu səfər təkcə beynəlxalq tribuna üçün deyil, həm də ölkəmizin iqtisadi və diplomatik maraqlarını gücləndirmək üçün strateji əhəmiyyət kəsb edir.
Bu görüşlər yalnız investisiya müzakirəsi deyil, həm də ölkəmizin stabil və etibarlı tərəfdaş kimi tanınmasının bariz nümunəsidir. Qarşı tərəfin təşəbbüsü ilə baş tutan görüşlər Azərbaycanın strateji əhəmiyyətini və regiondakı stabilliyi ilə bağlı beynəlxalq marağı bir daha təsdiqləyir.
BMT Baş Assambleyası yalnız sülh və təhlükəsizlik məsələlərinin müzakirəsi deyil, həm də ikitərəfli və çoxtərəfli diplomatik əlaqələrin genişləndirilməsi üçün imkanlar yaradır. Nyu-York səfəri həm də Azərbaycan Prezidentinin digər dövlət başçıları ilə görüşlərini əhatə edir.
Təəssüf ki, Azərbaycan uzun illər BMT-nin platformasında sülhə çağırışlar edib, lakin nəticə gözlənildiyi kimi olmamışdı. Ölkə öz səyləri ilə sülhü təmin etdi və indi beynəlxalq tribunada bu nailiyyəti nümayiş etdirəcək.
Bu səfər Azərbaycan üçün həm diplomatik, həm də iqtisadi baxımdan strateji əhəmiyyət daşıyır. Beynəlxalq tribuna, investorlarla görüşlər və sülh mesajları bir araya gələrək ölkənin həm regionda, həm də qlobal səviyyədə mövqeyini möhkəmləndirir.
Prezident İlham Əliyevin Nyu-York səfəri bir tərəfdən Azərbaycanın beynəlxalq nüfuzunu, digər tərəfdən isə ölkəyə olan maliyyə və investisiya marağını göstərir. Sülh təşəbbüsləri ilə paralel olaraq, qlobal maliyyə qurumları ilə aparılan görüşlər iqtisadi diplomatiyanın inkişafını təmin edir.
Stabil region iqtisadi inkişaf üçün əsas şərtdir, və investorlar üçün də Azərbaycan məhz bu sabitliyi və strateji mövqeyi ilə cəlbedicidir. Nyu-York səfəri deməyə əsas verir ki, diplomatiya yalnız protokol deyil, həm də investisiya və strateji maraqların qovuşduğu bir məkan ola bilər.
İqtisadi diplomatiya və sülh siyasəti bir-birindən ayrılmazdır və Azərbaycanın beynəlxalq nüfuzunu möhkəmləndirən əsas sütunlardır. Beləliklə, bu səfər Azərbaycan üçün həm iqtisadi gücünü beynəlxalq arenada nümayiş etdirmək, həm regionda stabillik və sülh mesajını çatdırmaq, həm də gələcək perspektivlər üçün strateji əməkdaşlıqların zəminini yaratmaq baxımından əhəmiyyətlidir.
İslam
Milli.Az