Dəvə hörümçəkləri (elmi adıyla, solpuqlar) təbiətin ən sirli və eyni zamanda qorxunc görkəmli canlılarından biri sayılır. Onların uzunluğu 15 santimetrə qədər çata bilər və olduqca iri çənələrə sahibdirlər.
Milli.Az bu barədə "BBC Wildlife Magazine"ə istinadən məlumat verir.
Hərçənd elmi baxımdan onlar hörümçək sayılmırlar, yenə də hörümçəklilər sinfinə daxildirlər. Bu maraqlı canlıların indiyədək 1000-dən çox növü aşkar edilib.
Dəvə hörümçəkləri səkkiz ayağa və ovlarını tutmaq üçün istifadə etdikləri iki pedipalpa malikdirlər. Bədən rəngləri adətən qəhvəyi və ya açıq qəhvəyi olur ki, bu da onlara səhralarda gizlənməyə və ovlarını asanlıqla izləməyə şərait yaradır.
Bu növə dünyanın bir çox bölgəsində Yaxın Şərq, Şimali Afrika, Hindistan, Meksika və ABŞ-ın cənub-qərbində rast gəlinir. Yalnız Avstraliya və Antarktidada yaşamırlar.
Dəvə hörümçəkləri olduqca sürətlidirlər, saatda 16 kilometrə qədər hərəkət edə bilirlər. Gecə ovlanmağı üstün tuturlar. Qidalanma rasionlarına siçan kimi xırda gəmiricilər, kərtənkələlər, müxtəlif həşəratlar və bəzən kiçik quşlar daxildir.
Zəhərli olmasalar da, əsas silahları güclü çənələridir. Bu çənələrin uzunluğu bəzən bədənlərinin üçdə biri qədər ola bilər. Mütəxəssislər bildirirlər ki, onların dişləməsi ağrılı olsa da, insanlar üçün həyati təhlükə yaratmır.
Dəvə hörümçəkləri haqqında geniş yayılmış miflərdən biri də onların dəvələrin bədəninə girərək içlərini yeməsidir. Lakin bu iddia elmi əsaslara söykənmir və həqiqəti əks etdirmir.
Kənan
Milli.Az