Beynəlxalq alimlər qrupu müəyyən edib ki insanlar özlərini və tərəfdaşlarını bərabər dərəcədə cazibədar hesab etdikdə romantik münasibətlərdə daha xoşbəxt və davamlı olurlar.
Milli.Az xəbər verir ki, araşdırmanın nəticələri "Evolutionary Psychological Science" jurnalında dərc olunub.
Evolyusiya psixologiyasında bu anlayış "tərəfdaş dəyəri" adlanır. Bu anlayış potensial tərəfdaş kimi insanın ümumi cazibədarlığını göstərir və görünüş, sağlamlıq, yumor hissi və digər xüsusiyyətləri əhatə edir. Əvvəllər partnyorun yüksək qiymətləndirilməsi münasibətdən məmnunluqla bağlı olduğu məlum idi, lakin tərəfdaş dəyərləri arasındakı fərqlərin təsiri tam aydın deyildi.
Tədqiqatçılar ABŞ-da 454 tələbəni və İsraildə 1764 yetkin iştirakçını sorğuya cəlb ediblər. İştirakçılar öz cazibədarlığını və partnyorun cazibədarlığını xüsusi anket vasitəsilə qiymətləndiriblər. Eyni zamanda münasibətlərdən məmnunluq, münasibətə bağlılıq və digər alternativləri dəyərləndirən ölçüləri doldurublar.
Analiz göstərib ki, hər iki tərəf özünü cazibədar hesab edən cütlüklər ən yüksək məmnunluq və münasibətə bağlılıq göstəricilərini nümayiş etdirib.
Alimlər qeyd ediblər ki, insanın öz cazibədarlığı ilə bağlı qavrayışı yaş, təcrübə və mədəni kontekstdən asılı olaraq dəyişir. Bu faktorlar həmçinin tərəfdaş dəyərləri arasındakı fərqin münasibətdə gərginlik yaratıb-yaratmayacağını və ya əksinə, əlaqəni gücləndirəcəyini müəyyən edə bilər.
İsmayıl
Milli.Az