Azərbaycan Respublikası Mədəniyyət Nazirliyi və Azərbaycan Respublikası Kino Agentliyinin dəstəyi, eləcə də Nizami Kino Mərkəzinin təşkilati dəstəyi ilə Narimanfilm kinostudiyası tərəfindən keçirilən "Salam" Beynəlxalq Yeniyetmə Film Festivalının dördüncü buraxılışı başa çatıb. Festival Paşa Holdinqin baş sponsorluğu ilə həyata keçirilib.
4 gün ərzində baş tutan 4-cü "Salam" BYFF-nın sonuncu günündə "Retrospektiva" proqramında 1964-cü ildə Kann festivalında "Ən yaxşı uşaq filmi" mükafatı qazanmış "Mənim adım Kojadır" (Qazaxıstan, 1964, rejissor Abdulla Karsakbayev) bədii filmi nümayiş olunmuş, rejissorun ailə üzvləri Mahirə Karsakbayeva və Musa Karsakbayev ilə görüş keçirilmişdir. Bu görüşdən sonra Festivalın xarici qonaqları üçün Azərbaycan Milli Xalça Muzeyinə ekskursiya təşkil olunmuşdur.
Nahardan sonra İro Riganın "Festivals are the key" (Yunanıstan, 2025) qısametrajlı sənədli filmi göstərilmiş və, nəhayət, Yeniyetmələrin 4-cü "Salam" BYFF ərzində "Cinemarathon" seminarı (mentorlar: Qurban Bünyatov, Eldar Albertson, Leylaxanım Qənbərli) zamanı çəkdikləri roliklər nümayiş olunmuşdur. Bu roliklərin nümayişi uşaqlarda gur emosiyalara səbəb olmuşdur.
Daha sonra Festivalın Art Directoru Leyla Dostəlizadə sponsorlara, mentorlara, könüllülərə və "Salam"ın komandasına təşəkkür bildirib, Festivalın konkurs proqramındakı filmlər arasından yeniyetmə-jürilərin səsverməsi nəticəsində müəyyən olunmuş qalibləri səsləndirmək üçün sözü Proqram direktoru Nərgiz Bağırzadəyə verdi. "Ən yaxşı bədii film" mükafatına "Dancing Queen in Hollywood" (Aurora Gosse, Norveç, 2025), "Jürinin xüsusi mükafatı"na isə "You are here, you were here" (Kousuke Sakoda, Yaponiya, 2019) filmi layiq görüldü. Festivalın təsisçisi və baş direktoru Nəriman Məmmədov mükafatı Yaponiyalı rejissora təqdim etdikdən sonra Kousuke Sakoda Festival haqqında öz xoş təəssüratları ilə bölüşdü, təşəkkürünü bildirdi. Rejissor Orxan Ağazadənin "Kinomexanikin qayıdışı" (Fransa, Almaniya, 2024) filminə isə "Festivalın xüsusi mükafatı" verildi. Mükafat filmin operatoru Daniel Quliyevə və first AD Leylaxanım Qənbərliyə təqdim olundu.
Mükafatlandırma bitdikdən sonra baş direktor Nəriman Məmmədov "Salam" BYFF-nın dördüncü buraxılışını bağlı elan etdi.
Beləliklə, son 4 gün ərzində bütün iştirakçılara inanılmaz duyğular və bayram əhval-ruhiyyəsi bəxş edən "Salam" BYFF-nın 4-cü buraxılışı musiqili əyləncə proqramı ilə sona çatdı.
İnformasiya dəstəyi - Trend.Az, Day.Az, Milli.Az, Azernews.Az