UEFA ÇL final oyunlarının başlama vaxtını DƏYİŞDİ

29 Avqust 2025 13:19

UEFA Çempionlar Liqasının final oyunları ilə bağlı yeni qərar verib.

Milli.Az xəbər verir ki, artıq bu mövsümdən etibarən turnirin həlledici qarşılaşmaları əvvəlkindən 3 saat tez başlayacaq.

Qurum 2025/26 mövsümündən etibarən final matçlarının Mərkəzi Avropa vaxtı ilə saat 18:00-da, Bakı vaxtı ilə isə 20:00-da start götürəcəyini açıqlayıb.

UEFA-nın məlumatında bildirilir ki, bu qərarın məqsədi ailələrin və uşaqların oyunu daha rahat izləməsinə şərait yaratmaq, yeniyetmələrin matçdan əvvəlki tədbirlərdə iştirakını təmin etmək və ictimai nəqliyyatdan istifadənin daha əlçatan olmasına imkan yaratmaqdır.

Qeyd edək ki, 2026-cı il UEFA Çempionlar Liqasının finalı mayın 30-da Macarıstanın paytaxtı Budapeştdə yerləşən "Puskas Arena"da keçiriləcək.

Hüseyn
Milli.Az