Hindistanın Uttar Pradeş əyalətində yaşayan 35 yaşlı Sarveş adlı qadının qaraciyərində 12 həftəlik körpə aşkar edilib. Dünyada indiyədək yalnız 45 qadında rast gəlinən bu nadir hal, həkimləri belə heyrətə salıb. Ölüm riski yaradan hamiləlik 90 dəqiqəlik əməliyyatla sonlandırılıb.
Sarveş uzun müddət mədə bulanması, yorğunluq və qarın ağrısı şikayəti ilə həkimə müraciət edib. İlkin müayinələrdə sadə mədə infeksiyası diaqnozu qoyularaq antibiotik müalicəsi başlanıb. Lakin şikayətlər azalmayınca aparılan ətraflı yoxlamalarda qadının qaraciyərində 12 həftəlik döl aşkar olunub.
BBC-yə danışan Sarveş vəziyyətini belə təsvir edib: "Daim qusurdum, yorğunluq və ağrı hiss edirdim. Nə baş verdiyini anlaya bilmirdim." Təcrübəli radioloq Dr. KK Gupta isə, "Qaraciyərinin sağ tərəfində 12 həftəlik körpə vardı. 20 illik həkimlik təcrübəmdə belə bir hal görməmişdim" deyib.
Mütəxəssislər bildirirlər ki, normalda döllənmiş yumurta uşaqlığa yerləşir. Bu nadir halda isə embrion qaraciyərə yapışaraq inkişaf etməyə başlayıb. Dünya üzrə indiyədək qeydə alınan 45 qaraciyər hamiləliyinin üçünün Hindistanda baş verdiyi qeyd olunur.
Əməliyyat Meerut şəhərindəki özəl xəstəxanada aparılıb. 90 dəqiqə davam edən əməliyyatda döl çıxarılıb, qadının qarın nahiyəsinə isə 21 tikiş atılıb. Hazırda yataq rejimində olan Sarveş gündəlik ehtiyacları üçün həyat yoldaşına möhtacdır. Onun həyat yoldaşı Paramvir isə "Biz kasıbıq, Delhi-də əməliyyat imkanımız yox idi. Üç ay çox çətin günlər keçirdik" sözləri ilə yaşadıqları sıxıntını izah edib.
Varanasi Tibb Elmləri İnstitutundan Prof. Dr. Mamta Singh, belə hamiləliklərin adətən fallop borularında rastlandığını, başqa orqanlara yerləşməsinin isə çox nadir hal olduğunu bildirib. Patna AIIMS Universitetindən Prof. Dr. Monika Anant isə qaraciyər hamiləliklərinin dünya miqyasında olduqca nadir görülən və çox riskli vəziyyətlər olduğunu vurğulayıb.
Lalə Qüdrətova
Milli.Az