Amazon-un qurucusu Jeff Bezosun anası və şirkətin erkən tarixində mühüm fiqur olan Jackie Bezos 78 yaşında dünyasını dəyişib. Bezos Ailə Fondu onun ölümünü Lewy cisimcikli demensiyaya qarşı uzun sürən mübarizədən sonra baş verdiyini təsdiqləyib. Jeff Bezos sosial şəbəkədə paylaşım edərək, anasının sevənləri əhatəsində, iradə və səxavətlə dolu bir ömürdən sonra dünyasını dəyişdiyini bildirib.
Milli.Az xarici mətbuata istinadən xəbər verir ki, Amazon bugünkü qlobal nəhəngə çevrilməzdən əvvəl, Jackie və onun həyat yoldaşı Miguel, Jeff-in riskli startapına ilk sərmayəni yatıran şəxslər olub. 1995-ci ildə onlar ümumilikdə 245,573 ABŞ dolları dəyərində iki çek yazıblar. Bu pulu itirəcəklərini gözləsələr də, bu risk düşündüklərindən qat-qat böyük uğur gətirib və nəticədə onlara çoxmilyardlıq sərvət qazandırıb. Jackie və Miguel bu sərvətin böyük hissəsini, xüsusilə erkən uşaqlıq təhsili sahəsinə, xeyriyyəçilik işlərinə yönəldiblər.
2000-ci ildə yaradılmış Bezos Ailə Fondu uşaqlar və gənclər üçün yüzlərlə təşəbbüsü dəstəkləyib. Bunlara Vroom valideynlik proqramı və ABŞ ilə Afrikadan seçilmiş istedadlı tələbələri liderlik inkişafında yetişdirən Bezos Təqaüdçüləri Proqramı daxildir. Cəmi ötən il fond indiyədək ən böyük ianəsini edərək, Aspen İnstitutuna gənclərə fokuslanan bir mərkəzin yaradılması üçün 185,7 milyon ABŞ dolları bağışlayıb.
Jackie-nin həyat hekayəsi dözümlülüklə dolu idi. 1946-cı ildə Virciniyada Jacklyn Marie Gise adı ilə doğulan Jackie, 17 yaşında ana olub və erkən çətinliklərlə üzləşib. Jeff-i əsasən tək böyüdüb, ta ki Miguel Bezosla tanış olana qədər. Miguel Jeff-i övladlığa götürüb. O, oğlunun təhsili üçün daim mübarizə aparması, onu istedadlı uşaqlar proqramlarına yerləşdirmək üçün əlindən gələni etməsi və onun texnologiyaya erkən marağını təşviq etməsi ilə tanınırdı.
Lalə Qüdrətova
Milli.Az