Prof. Dr. Naci Görür, Marmaranın zəlzələ yaratma müddətinin bitdiyini bildirərək, İstanbulda ən az 7,2 maqnitudasında zəlzələ ehtimalının çox yüksək olduğunu söyləyib. Ən böyük dağıntının Avropa tərəfində yaşanacağını vurğulayan Görür, mümkün zəlzələdə dəniz sahilindəki bölgələrdə titrəmə (ivmə) və dağıntı riskinin daha yüksək olacağını qeyd edib.
Milli.Az Türkiyə mətbuatına istinadən xəbər verir ki, Kuzey Anadolu Fayı xəttinin dünyanın ən çox zəlzələ yaradan fay xətlərindən biri olduğunu bildirən Görür deyib:
"Bu fay harada qırılarsa, növbəti zəlzələ üçün onun qərb hissəsi hədəf olur. 1999-cu ildə Kocaelidə qırıldı, onun qərbində biz varıq. İstanbulda ən az 7,2 maqnitudalı zəlzələ olma ehtimalı çox yüksəkdir."
Görür, fay xəttinin hər 250 ildən bir böyük zəlzələ yaratdığını, sonuncu böyük zəlzələnin 1766-cı ildə baş verdiyini xatırladaraq deyib:
"Marmaranın zəlzələ yaratma müddəti dolub. İstədiyiniz qədər dua edin, bu mexanizmi dayandıra bilməzsiniz. Zəlzələ təbiətin dəyişməz qanunlarına əsasən baş verir."
Zəlzələdə ən böyük dağıntının Avropa tərəfində görüləcəyini bildirən Görür sonda bunları qeyd edib:
"Anadolu tərəfində də bəzi bölgələrdə zəlzələnin gücü yüksək hiss olunacaq. Təxminən 8-9 bal gücündə zəlzələ ilə qarşılaşmağımız qaçılmazdır. 9 ballıq zəlzələdə ən möhkəm binalar belə ziyan görə bilər. Avropa tərəfində dəniz kənarında yaşayanlar mənzərənin həzzini çıxarırlar, amma mümkün zəlzələdə titrəmə və dağıntı riski çox daha yüksək olacaq."
Lalə Qüdrətova
Milli.Az