Qışda da təzə kimi dadlı və vitaminli giləmeyvələrdən istifadə etmək üçün düzgün dondurma üsulu vacibdir. Əgər giləmeyvələri düzgün dondursanız, onların dadı, rəngi və qida dəyəri uzun müddət qorunacaq.
Giləmeyvələrin dondurulma qaydası - addım-addım
Giləmeyvəni düzgün seçin
Tam yetişmiş, sağlam və zədəsiz giləmeyvələr seçin.
Çürük, yumşalmış və ya yararsız meyvələr dondurma üçün uyğun deyil.
Yuyun və qurudun
Giləmeyvələri soyuq suda yuyun, lakin uzun müddət suda saxlamayın.
Sonra yumşaq dəsmal və ya kağız salfetlə qurudun. Nəm qalarsa, buz bağlayar.
Saplaqları və tumları təmizləyin
Çiyələk, gilas, albalı kimi meyvələrdə saplaqları və tumları çıxarın (əgər istəmirsinizsə, gilas tumlu da dondurula bilər).
Əvvəlcədən sinidə dondurun
Giləmeyvələri bir qat halında boşluq buraxaraq tepsiyə düzün.
Tepsini 3-4 saatlıq dərin dondurucuya qoyun.
Bu üsul giləmeyvələrin birləşməsinin qarşısını alır.
Qablaşdırma və saxlanma
Donmuş giləmeyvələri hava keçirməyən dondurucu kisəsinə və ya plastik qablara yerləşdirin.
Qabın üzərinə tarix və məzmun yazmağı unutmayın.
Dərin dondurucuda -18°C-də 8-12 ay saxlamaq olar.
Hansı giləmeyvələr dondurula bilər?
Çiyələk
Moruq
Qaragilə (yaban mersini)
Albalı
Gilas
Zoğal
Qarağat və qırmızı qarağat
Giləmeyvəni qaynar su ilə yuyub dərhal dondurmayın - bu quruluşu pozar.
Yumşaq və artıq yetişmiş meyvələr dondurulduqda şor və çökəklikli ola bilər.
Lalə Qüdrətova
Milli.Az