Avtomobilin mühərriki hər bir nəqliyyat vasitəsinin "ürəyi" sayılır. Bu hissədəki nasazlıqlar vaxtında müəyyən olunmazsa, həm təhlükəli vəziyyətlər yarana, həm də baha təmir xərclərinə səbəb ola bilər.
Milli.Az xəbər verir ki, avtoekspertlər sürücülərə mühərrikdə problem olduğunu göstərən əsas əlamətlərə diqqət etməyi tövsiyə edirlər.
İşıq siqnalları (Check Engine lampası)
Ən çox rast gəlinən xəbərdarlıq "Check Engine" işığının yanmasıdır. Bu işıq mühərrikdə nasazlıq olduğunu göstərir və dərhal diaqnostika tələb edir. Problemin miqyası kiçik də ola bilər, ciddi də - buna görə gecikdirməmək vacibdir.
Qeyri-adi səslər
Mühərrikdən gələn cırıltı, taqqıltı və ya vurma səsləri daxildə hər hansı detalın zədələndiyini və ya yağa ehtiyac olduğunu göstərə bilər. Bu səslər xüsusilə mühərrik soyuq halda işə salınarkən daha çox eşidilə bilər.
Zəif çəkiş və titrəmə
Avtomobilin gücünün azalması, sürət yığmaqda çətinlik və mühərrikdə titrəmələr yanacaq sistemində, alışma şamlarında və ya silindrlərdə nasazlıqdan xəbər verə bilər.
Pis qoxular və tüstü
Egzoz borusundan çıxan mavi, qara və ya ağ tüstü, həmçinin yanmış yağ və ya benzin qoxusu mühərrikdə daxili problemlərin göstəricisidir. Mavi tüstü yağ yandırmanı, ağ tüstü isə sızan soyuducu mayeni göstərə bilər.
Artan yanacaq sərfiyyatı
Əgər avtomobil adi haldan daha çox yanacaq sərf edirsə, bu da mühərrikdə və ya yanacaq sistemində nasazlıqdan xəbər verə bilər. Bu, həm də ətraf mühitə zərərli emissiyaların artması deməkdir.
Avtoservis mütəxəssisləri sürücülərə mühərrikdə ən kiçik dəyişiklikləri belə ciddiyə almağı və texniki baxışları gecikdirməməyi tövsiyə edirlər. Zamanında görülən tədbirlər həm avtomobili qoruyar, həm də sahibini yüksək təmir xərclərindən xilas edə bilər.
Asya
Milli.Az