ABŞ Prezidenti Donald Tramp cümə günü sərt bəyanatla çıxış edərək, Yaxın Şərqdə sürətlə artan gərginlik fonunda İranı ABŞ və İsraillə razılaşmaya gəlmədiyi təqdirdə daha ağır nəticələrlə hədələyib.
Milli.Az xəbər verir ki, Tramp bu açıqlamanı özünün "Truth Social" adlı sosial media platformasında yayımlayıb.
O, İrana "dəfələrlə danışıqlar imkanı verildiyini", lakin Tehranın "heç vaxt buna nail ola bilmədiyini" bildirib.
Tramp vurğulayıb ki, İranın hərəkətsizliyi "gözlədiklərindən də pis nəticələrə" səbəb olacaq.
"ABŞ dünyanın ən güclü və ölümcül hərbi texnikasını istehsal edir və İsrailin onlardan kifayət qədər var, üstəlik daha çoxu da yoldadır. Bəzi sərt xətt tərəfdarı iranlılar özlərini cəsarətli göstərirdilər, amma onların hamısı indi ölüdür. Vəziyyət yalnız daha da pisləşəcək", deyə o, qeyd edib.
Bu bəyanat, İsrailin Tehran, Şiraz və Təbriz də daxil olmaqla, İranın bir neçə şəhərinə hava zərbələri endirməsindən bir neçə saat sonra səslənib. Həmin hücumlarda İranın yüksək rütbəli hərbçiləri və ən azı altı nüvə alimi öldürülüb. İran cavab olaraq İsrailə 100-dən çox pilotsuz uçuş aparatı (PUA) göndərib və bu, münaqişəni daha da alovlandırıb.
Trampın açıqlamaları İsrailin hücumlarına dəstək xarakteri daşıyıb və onları daha genişmiqyaslı "çəkindirmə strategiyası"nın bir hissəsi kimi təqdim edib.
O, "növbəti planlaşdırılan hücumların" daha dağıdıcı ola biləcəyini bildirib və hazırkı vəziyyəti "qırğın" adlandırıb:
"Hələ bu qırğını dayandırmaq üçün vaxt var. İran hər şeyini itirməmişdən əvvəl razılaşmaya gəlməli və bir zamanlar "İran imperiyası" kimi tanınan şeyi xilas etməlidir".
2024-cü il prezident seçkilərinə namizəd olan Tramp uzun müddətdir ki, İrana qarşı sərt mövqe nümayiş etdirir. Prezidentliyi dövründə o, ABŞ-ni 2015-ci il İran nüvə sazişindən birtərəfli qaydada çıxarıb və Tehrana qarşı ciddi sanksiyalar tətbiq etmişdi.
Onun son açıqlamaları regionda vəziyyətin son dərəcə gərgin olduğu bir vaxta təsadüf edir. İsrail rəsmiləri son hərbi əməliyyatın İranın silah istehsalı və regional militant qruplarla əlaqəli yüksək rütbəli hədəflərini zərərsizləşdirmək üçün vacib olduğunu bildirir. Bu arada İranın Ali Dini Lideri Ayətullah Əli Xamenei bu hücumları "sionist cinayət" adlandıraraq "sərt cəza" ilə hədələyib.
BMT və Səudiyyə Ərəbistanı, Pakistan kimi bir sıra regional güclər isə tərəfləri təmkinə çağıraraq genişmiqyaslı regional müharibənin başlaya biləcəyi barədə xəbərdarlıq ediblər.
Kənan
Milli.Az