Demək olar ki, hər kəs pulun bakteriyalar üçün ideal mühit olduğunu azı bir dəfə eşidib. Bəs hansı ölkələrin pul vahidləri dünyada ən çirkli hesab olunur?
Milli.Az "Time Magazine and the National Library of Medicine" nəşrinə istinadən xəbər verir ki, fərqli ölkələrin banknotlarında aşkar edilən mikrob sayı ilə bağlı bəzi təəccüblü faktlar var.
Pul niyə mikroblar üçün "ev"ə çevrilir?
Banknotlar daim əl dəyişdirdiyi və müxtəlif səthlərə toxunduğu üçün mikroorqanizmlər üçün ideal mühit sayılır. Araşdırmalar göstərir ki, kağız pullar yalnız zərərsiz bakteriyalar deyil, həm də təhlükəli xəstəliklərin törədicilərini daşıya bilər. Bu mikroblar insanla və ya çirklənmiş əşyalarla təmas nəticəsində pulun üzərinə düşür.
Mikroorqanizmlər pulun üzərinə yapışaraq, onun lifli quruluşunda uzun müddət qala bilir. Əgər kağız antibakterial örtüyə malik deyilsə, bu da bakteriyaların yaşamasını asanlaşdırır. Yüksək rütubət və temperatur da mikrobların sağ qalma müddətini artırır. Bu səbəbdən, insan pul ilə təmasdan sonra əllərini yusa belə, müəyyən bakteriyalar dəri üzərində qala bilər.
Dünyanın "ən çirkli" valyutalarının reytinqi
Araşdırmalara əsasən, bütün pullar mikroblar üçün eyni dərəcədə əlverişli deyil. Məsələn, avro, Norveç kronu və Böyük Britaniya funt sterlinqi banknotları ən "təmiz" valyutalar sırasındadır. Bunun səbəbi isə bu banknotların xüsusi tərkibə malik kağızdan hazırlanmasıdır ki, bu da bakteriyaların yayılmasının qarşısını alır.
Ən çox bakteriya aşkar edilən valyutalara isə Danimarka, İsveçrə və Rusiyanın pul vahidləri daxildir. Tək bir Danimarka kronunda 40,000, İsveçrə frankında isə 32,000 bakteriya aşkar olunub.
Lakin dünyanın ən çirkli pulu kimi tanınan banknot Çin yuanı olub. Bir banknotun üzərində 180,000-dən çox bakteriya tapılıb. Bunun əsas səbəbi Çində nağd pul dövriyyəsinin hələ də çox yüksək olmasıdır.
Pul üzərində aşkarlanan xəstəlik törədiciləri
Araşdırmalar göstərib ki, banknotların üzərində yalnız adi bakteriyalar deyil, cinsi yolla keçən xəstəliklərin törədiciləri də ola bilər. Bu, pulların uzun müddət dövriyyədə qalmasının və çoxsaylı insanlar arasında dolaşmasının təhlükəsini artırır.
Daha bir narahatedici məqam isə narkotik maddələrin izlərinin aşkar olunmasıdır. Məsələn, ABŞ-də dövriyyədə olan banknotların 10-dan 9-da kokain izlərinə rast gəlinib. Bəzi hallarda bu izlər o qədər yüksək səviyyədə olur ki, bank işçiləri narkotik testi zamanı yanlış pozitiv nəticə ala bilər.
Bu faktlar bizə pul ilə təmasdan sonra əlləri yumağın vacibliyini və toxunduğumuz səthlərə diqqətlə yanaşmağın əhəmiyyətini bir daha xatırladır.
Kənan
Milli.Az