İsti havalarda bir çox valideynlər körpələrini günəşdən qorumaq məqsədilə uşaq arabalarının üzərini yorğan, örtük və ya tənziflə örtürlər. Lakin bu zərərsiz görünən vərdiş əslində körpənin sağlamlığı üçün ciddi təhlükə yarada bilər.
Milli.Az xəbər verir ki, ukraynalı pediatr Dariia Vlasenko valideynləri bu mövzuda diqqətli olmağa çağırır.
Bu vərdiş niyə təhlükəlidir?
Həkimin sözlərinə görə, uşaq arabasının örtülməsi aşağıdakı riskləri artırır:
Sürətli bədən qızması (istivurma) - Örtük içəridə isti havanı saxlayır. Hətta orta temperaturda belə, arabanın içi tez bir zamanda çox isti ola bilər. Körpələrin bədən istiliyini tənzimləmə mexanizmi hələ tam formalaşmadığı üçün istivurma və ya bədən temperaturunun həddindən artıq yüksəlməsi riski artır.
Havanın dövranının pozulması - Örtük arabanın içində hava axınının qarşısını alır, nəticədə isti və durağan hava yığılır. Körpə nəfəs almaqda çətinlik çəkə bilər.
Ultrabənövşəyi şüaların artmas- Bəzi parçalar günəş şüalarının içəri keçməsinə və hətta onların güclənməsinə səbəb ola bilər.
Həyati təhlükə - Aşırı bədən istiliyi hallarında huşun itməsi, susuzlaşma, qıcolma və hətta birdən-birə körpə ölümü sindromu (SIDS) baş verə bilər.
Təhlükəsiz gəzintilər üçün tövsiyələr
Pediatr uşaq arabasını parçayla örtməməyi tövsiyə edir, çünki bu, havalandırmanı məhdudlaşdırır və istiliyin artmasına səbəb olur.
Aşağıdakı üsullar daha təhlükəsizdir:
Arabanın daxili kölgəlik hissəsindən və ya xüsusi çətirdən istifadə edin - Bu, həm kölgə yaradır, həm də hava axınına mane olmur.
Nəmləndirilmiş tənzif və kiçik portativ ventilyator - Belə bir kombinasiyanın arabanın içindəki temperaturu təxminən 4,7°C aşağı saldığı elmi araşdırmalarda sübut olunub.
Körpənin vəziyyətini mütəmadi yoxlayın - Dərinin qızarması, tərləmə, halsızlıq, narahatlıq və ya əsəbilik bədən istiliyinin artmasına işarə ola bilər.
Günorta saatlarından çəkinin - Gəzintilər üçün səhər və axşam saatları daha münasibdir, çünki hava daha sərin olur.
"Əgər belə bir vəziyyət görsəniz, digər valideynlərə bunu nəzakətlə xatırlatmaqdan çəkinməyin. Bir çoxu sadəcə bunun təhlükəli olduğunu bilmirlər," - deyə həkim bildirib.
Kənan
Milli.Az