M.Maqomayev adına Azərbaycan Dövlət Akademik Filarmoniyasının səhnəsində F.Əmirov adına Əməkdar Kollektiv Azərbaycan Dövlət Mahnı və Rəqs Ansamblının "Nadir rəqslər" adlı möhtəşəm konserti keçirilib.
F.Əmirov adına Əməkdar Kollektiv Azərbaycan Dövlət Mahnı və Rəqs Ansamblının (bədii rəhbər Xalq artisti Ağaverdi Paşayev, baletmeyster Əməkdar artist Ceyhun Qubadov, musiqi rəhbəri Mahir Ordubadi) müşayiəti ilə Xor qrupu (xormeyster Naala Baratelia) və solistlər - Azərbaycan Respublikasının Əməkdar artistləri Günel Şeyxova, Nigar Rzayeva, Elnur Süleymanov, Nastya Matsveyko, Qoçaq Əsgərov və Ruslan Hacıyev, Səbinə Ərəbli, Nigar Hüseynova, İlkin Dövlətov dinləyicilər qarşısında çıxış edib. Qeyd etmək lazımdır ki, Azərbaycan rəqsləri milli dəyərlərlə zəngin olub, özündə qəhrəmanlıq, mərdlik, həmrəylik, gözəllik,sülh və insanların bir-birinə məhəbbətini təcəssüm etdirir. Nadir musiqi gecəsində bəzən rəqslər mahnı ilə müşayiət olunurdu ki, bu zaman söz və rəqs elementləri rəngarəng harmoniya yaradaraq, tamaşaçılara duyğulu anlar və estetik zövq yaşatmış oldu. Fərqli təqdimatda keçirilən bu parlaq konsertdə hər bir ifaçı özünəməxsus şəkildə, sevgi dolu və yüksək ustalıqla çıxış etdi.
Proqramda Azərbaycan bəstəkar, xalq mahnı və rəqsləri səsləndi.
İnformasiya dəstəyi - Trend.Az, Day.Az, Milli.Az