Kanadanın Alberta əyalətində yerləşən bir liseydə verilən ev tapşırığı ölkələrarası qalmaqala səbəb olub.
Milli.Az xəbər verir ki, 12-ci sinif şagirdlərinə təqdim olunan "Bir diktator seç və təqdim et" mövzusunda tapşırıqda Türkiyə Cümhuriyyətinin qurucusu Mustafa Kamal Atatürkün adı Benito Mussolini və Səddam Hüseyn kimi diktatorlarla eyni sırada yer alıb.
Edmonton şəhərində yaşayan 12-ci sinif şagirdi İlayda Güvənç bu təhqiredici tapşırığı gördükdən sonra ailəsinə məlumat verib. Ailənin təşəbbüsü ilə məsələ dərhal Türkiyənin Ottavadakı səfirliyinə çatdırılıb və rəsmi müstəvidə təqib olunmağa başlanılıb.
Məsələ ilə bağlı açıqlama verən Türkiyənin Kanadadakı səfiri Can Dizdar bildirib:
"Atatürkün bu cür təqdim olunması qəbuledilməzdir. Təəssüf ki, bu tip tək-tük hallarla qarşılaşa bilirik. Lakin bu hadisəyə qarşı göstərilən vətəndaş həssaslığı çox önəmlidir. Biz bu səhvin düzəldilməsi və təkrar olunmaması üçün bütün diplomatik addımları atacağıq " .
Artan ictimai təzyiqlərdən sonra Alberta Dövlət Məktəbləri Təhsil Məsləhətçisi Kim Smith məsələ ilə bağlı açıqlama verərək bildirib:
"Tapşırıq yenidən dəyərləndiriləcək. İstifadə olunan yazılı materialların düzəlişə ehtiyacı olduğu qəbul edilir" .
Fidan
Milli.Az