Çili saatlarla işıqsız qalıb.
Milli.Az Reuters-ə istinadla xəbər verir ki, Çilidə elektrik kəsintisi paytaxt Santyaqonu qaranlığa qərq edib.
Elektrik kəsintisi saatlarla davam etdiyi üçün hava qaraldıqdan sonra Çili hökuməti fövqəladə vəziyyət elan edərək Arika bölgəsindən Los-Laqos bölgəsinə qədər 22:00-dan 06:00-a qədər komendant saatı tətbiq edib.
Daxili işlər naziri Karolina Toha kəsintinin ölkənin şimalında enerji ötürmə xəttindəki nasazlıqdan qaynaqlandığını və bunun kiberhücumla bağlı olmadığını bildirib.
Son illərin ən böyük elektrik kəsintisi paytaxtda küçə işıqlarını söndürüb, təcili yardım maşınlarının sirenləri isə şəhər boyunca eşidilib. Milyonlarla sərnişin daşıyan Santyaqo metrosu fəaliyyətini dayandırıb və sərnişinlər qatarlardan təxliyə olunub.
Daxili İşlər Nazirliyi ölkə üzrə asayişi qorumaq üçün silahlı qüvvələrin yerləşdirildiyini açıqlayıb.
Milli Elektrik Koordinatorunun (CEN) idarə heyətinin sədri Xuan Karlos Olmedo 22:00-a qədər elektrik sisteminin tələbatının dörddə birinin bərpa edildiyini və səhərə qədər tam bərpanın mümkün ola biləcəyini söyləyib.
Gecə saatlarında xalqa müraciət edən Çili Prezidenti Qabriel Borik 8 milyon evin elektrik kəsintisindən təsirləndiyini, lakin artıq onların yarısına enerji verildiyini bildirib.
"Bu gün baş verənlər qəbuledilməzdir, çünki bir və ya bir neçə şirkətin milyonlarla çililinin gündəlik həyatına təsir etməsi dözülməzdir. Buna görə də dövlətin borcudur ki, onları məsuliyyətə cəlb etsin," - deyə Borik vurğulayıb.
Elektriksiz qalmaq ölkənin şimalındakı iri mis mədənlərinin enerji təchizatını dayandıraraq qlobal metal bazarlarına təsir göstərib.
İslam
Milli.Az