Braziliya futbolunu əfsanəsi Antonio Lima böyrək və ürək problemləri səbəbilə bir aylıq xəstəxana müalicəsindən sonra 83 yaşında vəfat edib.
Lima 1961-1971-ci illər arasında Santosda oynayaraq Braziliya futbolunun qızıl dövrünün bir hissəsi olub. Həmin dövr Cənubi Amerika ölkəsinin həm klub, həm də milli səviyyədə görünməmiş uğurlar qazanaraq dünya futbolu ilə sinonimə çevrildiyi bir zamana təsadüf edirdi. Minas Gerais ştatından olan Lima, 19 yaşında Santos şəhərinə - São Paulodan bir saatlıq məsafədə yerləşən və yarım milyondan az əhalisi olan liman şəhərinə gəldi. O, Pelé-nin bacarıqları, uğurları və aurası sayəsində beynəlxalq şöhrət qazanan ulduzlarla dolu bir komandanın əsas üzvlərindən birinə çevrildi.
1960-cı illərdə Santos, təkcə Braziliyanın deyil, həm də dünyanın ən yaxşı komandası hesab olunurdu. Onlar heç kimin rəqabət apara bilməyəcəyi bir futbol sülaləsi yaratdılar. Rio-de-Janeyro klubu Botafogo Didi, Garrincha, Nilton Santos və Mario Zagallo kimi ulduzlara - daha sonralar isə Gerson və Jairzinho-ya sahib olsa da, Santos-un heyətində Gilmar, Carlos Alberto Torres, Clodoaldo, Zito, Mengalvio, Pepe, Coutinho və əlbəttə ki, Pelé var idi. Həmin heyətdə Lima çoxfunksiyalı oyunçu idi, əsasən sağ yarımmüdafiəçi mövqeyində oynamağı üstün tutsa da, müdafiədə də çıxış edə bilirdi. Buna görə də ona "Curinga" (vəziyyətə uyğunlaşan oyunçu) ləqəbi verilmişdi.
Lalə Qüdrətova
Milli.Az