.jpg)
Qışda, xüsusilə havaların soyuq və rütubətinin aşağı olduğu dövrlərdə üz dərisinin quruması və daha çox zədələnməsi riski artır. Bu səbəbdən üz dərisini qidalandırmaq və qorumaq üçün əlavə diqqət və xüsusi qulluq tələb olunur.
Milli.Az olaraq qışda üz dərisinin sağlam qalması üçün nələr edə biləcəyimizi öyrənmək üçün kosmetoloq Könül Kərimova ilə həmsöhbət olduq.
Onun sözlərinə görə, qışda dərinizin nəmlənməsini təmin etmək üçün daha ağır və qidalandırıcı, yağlı tərkibli kremlərdən istifadə etmək faydalıdır:
"Bu cür məhsullar dərinin qurumasının qarşısını alır və uzun müddət nəmlənmiş qalmasına kömək edir. Bu maddə dəriyə dərin nəmləndirmə verərək, suyu dərinin daha dərin qatlarına çəkir. Qışda bu cür məhsulları istifadə etmək dərini təravətləndirir. Qışda dəriniz daha çox quruduğuna görə, ölü hüceyrələri aradan qaldırmaq və dəriyə yenilik gətirmək vacibdir. Lakin, kimyəvi peelinglərdən istifadə edərkən diqqətli olun və çox sərt eksfoliasiyalardan qaçın. Yumşaq peelinglər və ya enzimli maskalar dərini təmizləyir və daha parlaq bir görünüş təmin edir. Qidalandırıcı üz maskalarından da istifadə edə bilərsiniz. Bu zaman dəriniz nəmlənəcək və qışın soyuğunda itirilmiş suyu geri qaytarmağa kömək edəcək. Maskaların içində olan maddələr (avokado, bal, yağlar və vitaminlər) dərinin sağlam və elastik görünməsinə kömək edir. Yağlı üz maskaları (kakao yağı, jojoba yağı, badam yağı və s.) dərinin təbii yağ balansını bərpa edir və quruluğu azaldır".
Mütəxəsis deyir ki, qışda günəşdən qorunma çox vacibdir, çünki soyuq hava və qarın əks etdirdiyi günəş şüaları dərinizin zədələnməsinə səbəb ola bilər.
.jpg)
"Bu səbəbdən, qışda da SPF (günəşdən qorunma faktorlu) məhsullardan istifadə etməlisiniz. Soyuq havada bəzən dərinizin üzərində çoxlu kir və yağ yığılaraq dəri tıxanabilər. Buna görə də, gündəlik olaraq yüngül və dərini qurutmayan təmizləyicilərdən istifadə edin. Təbii təmizləyicilər (bal, aloe vera və s.) dərini qurudulmadan təmizləyərək sağlam qalmasına kömək edir. Gecə dərisi gündüzdən daha çox bərpa olunur, buna görə də gecə kremi və ya üz yağı istifadə edərək dərinin daha yaxşı bərpa olunmasını təmin edə bilərsiniz. Retinol və vitamin C kimi maddələr gecə istifadəsi üçün yaxşı seçimlərdir, çünki onlar dərinin hüceyrə yenilənməsini stimullaşdırır. Ev və iş yerində isə istilik sistemləri dərinin qurumasına səbəb ola bilər. Bu səbəbdən hava nəmləndirici cihazlardan istifadə edərək havadakı rütubəti artırın və dərinizin su balansını qoruyun", deyə o, vurğulayır.
Həmsöhbətimiz tövsiyə edir ki, qışda su içməyi qəti unutmaq olmaz:
.jpg)
"Bəzən su içmək unudula bilər, lakin dərinizin sağlamlığı üçün bu çox önəmlidir. Dərinin nəmlənməsini təmin etmək və təravətini qorumaq üçün gündə ən az 8-10 stəkan su içməyə çalışın. Qışda üz dərisini düzgün və davamlı şəkildə qidalandıraraq həm görünüşünü, həm də sağlamlığını qorumaq mümkündür. Yuxarıdakı tövsiyələrə riayət etməklə dərinizin soyuq hava şərtlərinə qarşı mübarizəsini gücləndirə bilərsiniz".
Xəyal Abdullayev
Milli.Az