Cənubi Qafqazda sabitliyin təmin olunması Azərbaycan və Ermənistan arasında sülh sazişinin imzalanmasından keçir.
Milli.Az xəbər verir ki, bu fikirləri Türkiyənin milli müdafiə naziri Yaşar Gülər jurnalistlərə açıqlamasında səsləndirib. Nazirliyin Mətbuat Xidməti tərəfindən yayılan məlumatda Y.Gülər iki ölkənin sülh istiqamətində atdığı addımları və son dövrlərdə əldə olunan irəliləyişi məmnuniyyətlə qarşıladıqlarını bildirib.
"Türkiyə hər zaman Azərbaycanın haqlı mübarizəsini dəstəkləyib və bu dəstəyi davam etdirəcək. Bu gün Qarabağın hər bir guşəsində şanlı Azərbaycan bayrağının dalğalanmasından böyük məmnunluq duyuruq. 'Bir millət - iki dövlət' şüarı ilə əlaqələrimizi, xüsusən müdafiə sənayesi və hərbi əməkdaşlıq sahələrində, ən yüksək səviyyəyə qaldırmağa çalışırıq," - deyə Yaşar Gülər qeyd edib.
Milli.Az