Mixail Kavelaşvili Gürcüstanın yeni prezidenti seçilib.
Milli.Az Trend-ə istinadən bildirir ki, bu barədə Gürcüstan Mərkəzi Seçki Komissiyası məlumat yayıb.
Bildirilib ki, o, 300 mümkün səsdən 224 səs toplayıb. Prezident seçilmək üçün ən azı 200 səs lazım idi.
Kavelaşvilinin andiçmə mərasimi dekabrın 29-na təyin edilib.
Qeyd edək ki, Mixail Kavelaşvili deputat, Gürcüstanın futbol üzrə yığma komandasının keçmiş hücumçusu olub.
Xatırladaq ki, Gürcüstanın hazırkı Prezidenti Salome Zurabişvilinin səlahiyyət müddəti dekabrın 16-da başa çatır. Buna baxmayaraq, o, dövlət başçısı kimi səlahiyyət müddəti bitdikdən sonra prezident sarayını tərk etməyəcəyini bildirib.
---------
14:29
Gürcüstan parlamentində keçirilən prezident seçkiləri başa çatıb.
Milli.Az bildirir ki, qaydalara əsasən, səsvermə başa çatdıqdan sonra MSK-nın iclası keçiriləcək və nəticələr hesablanacaq, müvafiq yekun protokol tərtib olunacaq.
MSK nümayəndələri daha sonra parlamentin iclas zalına qayıdaraq prezident seçkilərinin nəticələri barədə ictimaiyyəti məlumatlandıracaqlar.
Qeyd edək ki, seçkilərdə yeganə namizəd hakim "Gürcü Arzusu"nun təqdim etdiyi Mixail Kavelaşvilidir. /APA
---------
09:28
Gürcüstanda bu gün prezident seçkiləri keçirilir.
Milli.Az xəbər verir ki, Gürcüstan tarixində ilk dəfə prezident ümumxalq səsverməsi ilə deyil, parlamentdə seçki kollegiyası tərəfindən seçiləcək.
14 dekabr 2024-cü ildə Gürcüstanda prezident seçkiləri keçirilir və bu seçkilər əvvəlki sistemdən fərqli olaraq xalqın birbaşa iştirakı ilə deyil, seçicilər kollegiyası vasitəsilə həyata keçirilir. Seçicilər kollegiyası parlament üzvlərindən və digər təmsilçilərdən ibarət xüsusi bir qurumdur. Bu yeni sistem Gürcüstanın konstitusiya dəyişiklikləri çərçivəsində tətbiq olunub və məqsədi prezidentin seçilməsində parlamentar idarəetmə modelinə yaxınlaşmaqdır.
Gürcüstanda prezident seçkiləri seçicilər kollegiyası vasitəsilə aparılır. Kollegiyaya parlamentin 150 deputatı, Acarıstan Ali Sovetinin 21 üzvü, Abxaziya Ali Sovetinin 20 nümayəndəsi və müxtəlif bölgələrdən 109 rayon sakrebulosunun nümayəndələri daxildir. Müxalifət partiyaları bu prosesi boykot edərək nə seçkilərdə iştirak edir, nə də prezidentliyə namizəd irəli sürüb. Beləliklə, yeganə namizəd hakim "Gürcü Arzusu - Demokratik Gürcüstan" partiyasından Mixail Kavelaşvilidir. O, keçmiş parlament üzvü olmaqla yanaşı, futbolçu karyerası ilə də tanınır.
Yeni seçilən prezident 5 il müddətinə vəzifədə qalacaq. Bu seçkilərin nəticəsi ilə Gürcüstanın növbəti prezidenti müəyyənləşəcək. Andiçmə mərasimi isə 29 dekabr 2024-cü il tarixində keçiriləcəkdir. Beləliklə, bu seçkilər yalnız prezident postunun taleyini müəyyən etməklə qalmır, eyni zamanda ölkənin siyasi sistemindəki islahatların icrası baxımından mühüm əhəmiyyət kəsb edir.
İslam
Milli.Az