Türkiyənin məşhur həkim və sağlam qidalanma mütəxəssisi, professor Canan Karatay insan sağlamlığı üçün riskli hesab olunan bir qida ilə bağlı vacib xəbərdarlıq edib.
Milli.Az musavat.com-a istinadən bildirir ki, Karatay "dəli bal" adlanan xüsusi növ balın tərkibindəki toksinlərin ciddi sağlamlıq problemlərinə səbəb ola biləcəyini bildirib.
Dəli bal nədir və niyə təhlükəlidir?
Dəli bal, əsasən, Qara dəniz bölgəsində yetişən rhododendron bitkisinin çiçəklərindən alınır. Bu balın tərkibində qrayanotoksin adlı toksik maddə var.
Bu maddə aşağıdakı təsirlərə səbəb ola bilər:
Qan təzyiqinin ani şəkildə düşməsi,
Ürək ritminin pozulması,
Başgicəllənmə və bulanıq görmə,
Ürəkbulanma və mədə narahatlığı,
Gözdə və dəridə qızartı, ağızda qaşınma.
Dəli bal çox yedikdə, hətta adamı müvəqqəti dəli edə, onun təsiri altında insan xəyallar görə bilər.
Canan Karatay qeyd edib ki, dəli balın hətta bir qaşığı belə bu qidaya öyrəşməmiş bədənlərə ciddi ziyan verə bilər. Xüsusilə hamilə qadınlara və süd verən analara bu baldan uzaq durmaq tövsiyə olunur.
Bəs adi bal ilə dəli balı necə fərqləndirək?
Dad: Dəli bal acı və tünd bir dada malikdir, adi bal isə şirin və yüngül dadlıdır.
Tərkib: Dəli bal qrayanotoksin ehtiva edir, adi bal isə bu maddəni tərkibində saxlamır.
İstifadə: Dəli bal müalicə məqsədli və nəzarətli şəkildə istifadə olunur, adi bal isə geniş istehlak olunur.
Canan Karatay, xüsusilə təcrübəsiz istehlakçıların dəli balı adi baldan fərqləndirə bilmədiyini və bu səbəbdən təhlükə ilə üzləşdiklərini vurğulayıb. İstehlak etməzdən əvvəl məhsulun laborator analizlərinin aparılması vacibdir.
Mütəxəssisin tövsiyələrinə əməl edərək sağlamlığınızı qorumaq üçün bu növ baldan uzaq durmağınız məsləhətdir.
Milli.Az