Oktyabrın 21-də ABŞ-ın Pensilvaniya ştatında yerləşdirildiyi xəstəxanada vəfat edən FETÖ terror təşkilatının lideri Fətullah Gülənin məzarından yayılan görüntü müzakirələrə səbəb olub.
Milli.Az globalinfo.az-a istinadla xəbər verir ki, Gülən 1941-ci il aprelin 27-də dünyaya gəlsə də, onun məzar daşında doğum tarixi 1938-ci il olaraq qeyd edilib.
Məlumata görə, Gülən sağlığında özünün 1938-ci il 11 noyabr tarixində doğulduğunu deyir və hər yerdə belə qeyd edirmiş. Buna səbəb Türkiyə Cümhuriyyətinin qurucusu Mustafa Kamal Atatürkün 1938-ci il 10 noyabr tarixində vəfat etməsidir. Belə ki, Atatürk əleyhinə ideya və təbliğatı ilə tanınan Gülənin onu "dəccal" kimi, ölümünün ertəsi gün dünyaya gəldiyini deyərək isə özünü Mehdi kimi təqdim etməyə çalışdığı bildirilir. Bu səbəbdən onun tərəfdarları məzar daşına istədiyi tarixi qeyd ediblər.
Qeyd edək ki, Fətullah Gülən Pensilvaniyada evinin yaxınlığındakı qəbiristanlıqda dəfn edilib.
Milli.Az