İyunun 4-də Bakı Ekspo Mərkəzində Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz - "Caspian Oil&Gas" və 12-ci Xəzər Beynəlxalq Energetika və Yaşıl Enerji - "Caspian Power" sərgilərinin rəsmi açılış mərasimi baş tutub. Azərbaycan Respublikasının Prezidenti İlham Əliyev tədbirdə çıxışı zamanı bir sıra vacib məqamlara toxunub.
Bakı Enerji Həftəsi, əvvəllər Xəzər Neft və Qaz Sərgisi olaraq bilinən və 1994-cü ildən bəri keçirilən tədbir, Azərbaycanın enerji sektorunda əhəmiyyətli rol oynayıb. 30 il ərzində bu tədbir neft, qaz, kəşfiyyat və hasilat, emal və nəqliyyat, həmçinin, yaşıl enerji sahələrini əhatə edən genişmiqyaslı bir tədbirə çevrilib. Hər il dünyanın enerji sənayesinin liderlərini bir araya gətirən bu həftə Azərbaycanın beynəlxalq aləmdəki enerji mövqeyini möhkəmləndirir.
Azərbaycanın enerji sektorunun mühüm tədbiri olan Bakı Enerji Həftəsi bu il də öz əhəmiyyətini qoruyub saxlayıb. Bu həftə ərzində keçirilən tədbirlər üç əsas seqmenti birləşdirir: neft, qaz və yaşıl enerji. Bu il tədbirə 37 ölkədən 300-ə yaxın şirkətin qatılması və dünyanın enerji sənayesi sahəsində mövcud olan liderlərin bir araya gəlməsi Azərbaycanın enerji sektorunda əhəmiyyətli bir yer tutduğunu bir daha təsdiqləyir.
Prezident İlham Əliyevin çıxışında Azərbaycan enerji sektorunun inkişafı və əldə olunan uğurlar barədə geniş məlumat verib. Prezidentin mesajları ölkənin neft və qaz sektorunda qazandığı uğurlar, eləcə də, yaşıl enerjiyə keçid istiqamətində atılan addımlar haqqında məlumat verir. Azərbaycanın enerji ilə bağlı bütün səylərinin və layihələrinin ölkənin iqtisadi inkişafına və xalqının rifahına xidmət etdiyini vurğulayan Prezident İlham Əliyev beynəlxalq tərəfdaşlıqların əhəmiyyətini də qeyd edib.
Azərbaycanın neft tarixində yeni dövrü "Əsrin müqaviləsi" və "Şahdəniz" layihəsi kimi mühüm hadisələrdən ilham alaraq, bu il bərpa olunan enerji sahəsində də mühüm addımlar atılacaq. 2027-ci ilədək 2 qiqavat həcmində bərpa olunan enerji əldə edilməsi hədəfi ölkənin yaşıl enerji potensialını artıracaq və enerji təhlükəsizliyinə töhfə verəcək.
Azərbaycanın beynəlxalq aləmdə enerji təhlükəsizliyinə verdiyi töhfələr ABŞ, Aİ, Türkiyə və ərəb-islam dünyası ilə olan əlaqələri ilə möhkəmlənib. ABŞ Prezidenti Co Baydenin tədbirə göndərdiyi məktub ABŞ-Azərbaycan münasibətlərinin yüksək səviyyədə olduğunu nümayiş etdirir. Azərbaycan, həmçinin, BƏƏ və Braziliya ilə birgə "Troyka" təsis edərək, iqlim dəyişikliyi ilə mübarizədə beynəlxalq əməkdaşlıq şəbəkəsini genişləndirir.
COP29-a ev sahibliyi etməyə hazırlaşan Azərbaycan iqlim dəyişikliyi və onun fəsadları ilə mübarizədə qlobal səylərə öz töhfəsini verməyə sadiqdir. Xəzər dənizinin səviyyəsinin azalması və su resurslarının azalması kimi problemlərlə üzləşən ölkə enerji sektorunda bərpa olunan resurslara keçidi sürətləndirir.
COP29 mövzusuna toxunan Prezident Əliyev Azərbaycanın qlobal aktor rolunda çıxış etdiyini və yeni əməkdaşlıq şəbəkəsinin yaradılmasında əhəmiyyətli bir yer tutduğunu qeyd edib. Azərbaycan iqlim dəyişikliyi ilə mübarizə sahəsində proaktiv addımlar ataraq beynəlxalq ictimaiyyətlə birgə çalışır.
Azərbaycanın beynəlxalq əlaqələrinin genişlənməsi və əməkdaşlıq coğrafiyasının artması ölkənin enerji sektorunda əldə etdiyi uğurların nəticəsidir. ABŞ, Aİ, Türkiyə və ərəb-islam dünyası ilə olan əlaqələr Azərbaycanın qlobal enerji bazarında əhəmiyyətli bir rol oynadığını göstərir.
Bakı Enerji Həftəsi çərçivəsində keçirilən tədbirlər və əldə olunan nəticələr Azərbaycanın enerji sektorunda mühüm bir rol oynadığını və beynəlxalq səviyyədə tanındığını bir daha sübut edir. Bu həftə ərzində əldə olunan yeni ideyalar, təmaslar və müqavilələr Azərbaycanın enerji siyasətində yeni bir dövrün başlanğıcını işarə edir.
Azərbaycan həm neft və qaz sektorunda, həm də bərpa olunan enerji sahəsində atdığı addımlarla qlobal enerji bazarında öz mövqeyini gücləndirir və beynəlxalq tərəfdaşlıqlarını genişləndirir. Bu tədbir, Azərbaycanın gələcəkdə də enerji sektorunda əhəmiyyətli bir rol oynayacağını və dünya enerji bazarında mühüm bir yer tutacağını göstərir.
Asif Mehman
TREND