Laçında kiçik su elektrik stansiyasının (KSES) təməlqoyma mərasimi olub.
Milli.Az Trend-ə istinadən xəbər verir ki, Azərbaycanın Kəlbəcər və Laçın rayonlarında beş kiçik su elektrik stansiyasının istismarı layihəsi çərçivəsində "Malıbəy" kiçik su elektrik stansiyasının təməlqoyma mərasimi keçirilib.
Tədbirdə iqtisadiyyat nazirinin müavini Anar Axundov, Azərbaycan Respublikası Prezidentinin Laçın rayonunda xüsusi nümayəndəsi Məsim Məmmədov, "Azərbaycan İnvestisiya Şirkəti" ASC-nin icraçı direktoru Ülvi Mansurov, "Demirören Yatırım Holding A.Ş." şirkətlər qrupunun İdarə Heyətinin sədri Yıldırım Demirören, "Arges Enerji Team" MMC-nin rəhbəri Mehmet Fehmi Özata və İqtisadiyyat Nazirliyinin müvafiq strukturlarının nümayəndələri iştirak edib.
Qeyd olunub ki, Azərbaycan Respublikasının Prezidenti İlham Əliyevin rəhbərliyi altında işğaldan azad edilmiş ərazilər uğurla alternativ və "yaşıl" enerji zonalarına çevrilir. Bölgənin infrastruktur təminatının yaxşılaşdırılması üçün müasir tələblərə cavab verən enerji təchizatı sistemi formalaşdırılır. "Yaşıl" elektrik enerjisinin təmin edilməsində su elektrik stansiyaları mühüm rol oynayır. İşğaldan azad edilmiş ərazilərdə çayların yüksək hidroenergetika potensialı inşa və bərpa olunacaq layihələrin səmərəliliyini artırır. Bu istiqamətdə özəl investorlarla əməkdaşlıq vacibdir.
Bildirilib ki, Kəlbəcər və Laçında kiçik su elektrik stansiyalarının bərpası və istismarı layihəsi Azərbaycan-Türkiyə qardaşlığının daha bir göstəricisidir. Bu, işğaldan azad edilmiş ərazilərdə özəl sektorla birgə həyata keçirilən ilk su elektrik layihəsidir.
Layihənin birinci mərhələsi çərçivəsində təməli qoyulan "Malıbəy" stansiyasının istismara verilməsi 7 minə yaxın evi elektrik enerjisi ilə təmin edəcək.
Qeyd edək ki, ötən ilin dekabr ayında "Azərbaycan İnvestisiya Şirkəti" ASC, "Demirören Yatırım Holding A.Ş." şirkətlər qrupu (Türkiyə) və "Arges Enerji Team" MMC arasında Birgə İştirak Müqaviləsi imzalanıb. Müqaviləyə əsasən, Hekəri və Tərtər çayları üzərində beş KSES istifadəyə veriləcək.
Layihənin ümumi dəyəri 25 milyon manatdır. Bütünlükdə 2025-ci ildə, ümumi gücü 13,8 meqavatt olan beş stansiyanın istismara verilməsi planlaşdırılır. Stansiyaların istismar müddəti 30 ildir. Layihənin icrası 25 yeni iş yerinin açılmasına imkan verəcək.
Layihənin 1-ci mərhələsində Laçın rayonu ərazisində Zabux çayı üzərində 5,1 meqavatt gücündə "Malıbəy" SES-in, 2-ci mərhələdə 3,4 meqavatt gücündə "Qalaça 2" SES, 1,8 meqavattlıq "Minkənd" SES və 1,1 meqavatt gücündə "Qalaça 1" SES-in tikintisi planlaşdırılır. 3-cü mərhələdə Kəlbəcər rayonunda Tərtər çayının üzərində 2,4 meqavattlıq "Tərtər 1" KSES-in tikintisi nəzərdə tutulur.
Milli.Az
Xəbərlərimizi WhatsApp kanalımızAdan da oxuyun