Bir neçə gün əvvəl paytaxtı Bakı şəhərinin Baş planı təsdiqlənib. Baş nazir Əli Əsədov bununla bağlı dekabrın 30-da qərar imzalayıb. Qərara əsasən, Bakının inkişafına dair bu plan 2040-cı ilədək olan dövrü əhatə etməlidir.
Planın hansı sahələri əhatə etməsi ilə bağlı müəyyən məlumatlar ictimaiyyətlə bölüşülüb. Vətəndaşlara maraqlı olan isə bu planda uzun illərdir davam edən sənədsiz evlərin sənədləşdirilməsi ilə bağlı problemin həll yolunun da öz əksinin tapıb tapmamasıdır.
Milli.Az xəbər verir ki, məsələ ilə bağlı Milli Məclisin deputatı Aydın Hüseynov referans.az -a açıqlamasında danışıb.
"Bakının Baş planı 2040-cı ilə qədər olan dövr üçün təsdiqlənib. Planın təxmini dəyəri 93 milyard manatdır. Bura layihələrin həyata keçirilməsi, görüləcək işlər və s. aiddir. Sənədsiz evlər isə ayrıca bir məsələdir. Baş planda, əsasən, tikiləcək yollardan, hər hansı bir şəhər infrastrukturundan söhbət gedir. Bildiyiniz kimi artıq sənədsiz evlərlə, obyektlərlə bağlı qanun qəbul olundu. 2002-ci il mart ayının 1-nə qədər olan sənədsiz obyektlərin özəlləşdirilməsi, sənədləşməsi ilə bağlı qaydalar müəyyənləşib. Bildiyiniz kimi sənədsiz bina evləri ilə bağlı məsələ artıq öz həllini tapıb, lakin fərdi yaşayış evləri, qanunsuz ərazilərdə tikilən evlər ilə bağlı problem hələ də aktualdır. Bu məsələ hələ də müzakirə olunur. İqtisadi İnkişaf Nazirliyinin müvafiq qurumu hökumətə müəyyən təkliflərlə çıxış edəcək".
Deputat qeyd edib ki, nəzərdə tutulan evlərin sənədləşdirilməsi prosesi bir çox səbəblərdən dolayı illərdir uzanır.
"Neft ərazilərində, kənd təsərrüfatı təyinatlı torpaqlarda tikilən evlər hər biri bu prosesi daha da yubadır. Lakin artıq bu evlərin nəyə görə o torpaqlarda tikilməsini araşdırmaq vaxt itkisidir və prosesin tezliklə yekunlaşmasına mənfi təsir göstərir. Sadəcə faktın bundan ibarət olduğunu qəbullanmaq lazımdır. Buna görə də hazırda neftli ərazilər müəyyənləşməlidir. Kənd təsərrüfatı əhəmiyyətli torpaqlar da Kənd Təsərrüfatı nazirliyinin balansından çıxarılmalıdır".
Aydın Hüseynov vurğulayıb ki, bu problemin kökündən həll olunması üçün əsas addımlardan biri də torpaqların təyinatının tam dəqiqliklə müəyyən edilməsidir.
Milli.Az
Xəbərlərimizi WhatsApp kanalımızdan da oxuyun