Süni intellekt vasitəsilə şəkillərdə insan gözü ilə seçilməsi mümkün olmayan fərqli detalları görmək öyrədilə bilər.
Milli.Az sfera.az-a istinadən xəbər verir ki, süni intellektdən istifadə edən alimlər Rafaelin məşhur "Qızılgül Madonnası" əsərində Müqəddəs İosifin üzündə qeyri-adi bir detal aşkar ediblər.
Tədqiqatçılar hesab edirlər ki, bu üz İntibah dövrü rəssamının əli ilə çəkilməyib. Əslində, "Qızılgül Madonnası"nın Rafael tərəfindən çəkilib-çəkilməməsi uzun müddətdir mübahisə mövzusudur. İndi süni intellektdən istifadə etməklə aparılan rəsmin təhlili də göstərdi ki, şah əsərin bəzi hissələri başqa bir rəssamın əli ilə çəkilib.
Alimlər müəllifi mütləq Rafael olan əsərlər əsasında xüsusi analiz alqoritmi yaradıblar. Bunun sayəsində süni intellekt məşhur rəsmdə insan gözündən gizlədilən detalları görə bilib.
Süni intellekt xüsusilə, rəssamın üslubunu, onun toxunuşlarının xüsusiyyətlərini, rəng palitrasını, kölgələri, eləcə də şəklin hər bir detalını tanıya bilir.
Alimlər süni intellektdən təkcə bütün şah əsəri təhlil etmək üçün deyil, rəsmdəki fərdləri öyrənmək üçün istifadə ediblər. Rafaelin şah əsərində Məryəm, körpə İsaya üzərində yazı olan perqament verən Vəftizçi Yəhya və Müqəddəs İosif (yuxarı sol küncdə) təsvir edilmişdir.
Alimlər hesab edirlər ki, Müqəddəs İosifdən başqa şəkildəki bütün personajlar çox güman ki, Rafaelin əli ilə çəkilib.
Qeyd edək ki, bu şedevr əsərlə bağlı keçmiş araşdırmalar artıq sübut edib ki, Müqəddəs İosifin üzü rəsmdəki digər üzlərdən daha pis rənglənib. Yeni süni intellekt keçmiş təhlilləri təsdiqlədi. Baxmayaraq ki, bunu dəqiq söyləmək hələ çox tezdir, amma alimlər deyirlər ki, Müqəddəs İosifin üzünü Rafaelin tələbəsi Giulio Romanonun çəkmə ehtimalı yüksəkdir.
"Qızılgüllü Madonna" rəsminin 1518-1520-ci illərdə çəkildiyi güman edilir. 19-cu əsrin ortalarında isə sənət tarixçiləri Rafaelin bütün sənət əsərinin tək müəllifi olmaya biləcəyindən şübhələnməyə başladılar.
Alimlər şah əsərin əlavə təhlilinin aparılmasına ehtiyac olduğunu bildirsələr də, bu şübhələr, demək olar ki, tam təsdiqini tapıb. Bu da süni intellekt vasitəsilə mümkün olacaq.
Milli.Az
Xəbərlərimizi WhatsApp kanalımızdan da oxuyun