Azərbaycan Qızıl Aypara Cəmiyyəti “Meta” (Facebook, Instagram və WhatsApp sahibi) şirkəti ilə rəsmi əməkdaşlığa başladı

14 Mart 2023 12:10

100 ildən artıq şanlı tarixə malik Azərbaycan Qızıl Aypara Cəmiyyəti (AzQAC) Respublikada dövlət qanunu ilə rolu müəyyən olunmuş ən böyük humanitar təşkilatdır. AzQAC vətəndaşlıq, milliyyət, irq, yaş, cins (cinsiyyət), dini inanc, sinfi və ya siyasi düşüncələrinə görə heç bir ayrı-seçkilik qoymadan insanlara humanitar yardım göstərir.

Azərbaycan Qızıl Aypara Cəmiyyəti humanitar ehtiyacların getdikcə artdığı bir dünyada özünün qətiyyətli humanitar missiyasının keyfiyyətini artırmaq məqsədi ilə və Beynəlxalq Qızıl Xaç və Qızıl Aypara Cəmiyyətləri Federasiyası (IFRC) dəstəyi ilə "Meta" (Facebook, Instagram və WhatsApp sahibi) şirkəti ilə rəsmi əməkdaşlığa başlamışdı.

Azərbaycan Qızıl Aypara Cəmiyyəti və "Meta" birgə əməkdaşlığı Azərbaycanda əhalinin həssas qruplarına daxil olan insanların həyat şəraitini yaxşılaşdırmaq üçün bir töhfə verəcək və humanitar yardımı lazım olan yerdə və vaxtında, səmərəli və effektiv şəkildə göstərməsi üçün tələb olunan bütün resurslara malik olmasına imkan yaratmağa yönələcəkdir.

"Bu tərəfdaşlıq sayəsində gördüyümüz işlər və yerinə yetirilən humanitar missiyamız haqqında məlumatların Facebook, Instagram və WhatsApp sahəsində geniş ictimaiyyətə daha da səmərəli çatdırılmasına və bizim könüllülük və fandreyzinq fəaliyyətimizə yeni insanların cəlb olunmasına imkan verəcək", - deyə Resursların səfərbər edilməsi, fandreyzinq və marketinq inkişafı layihələrinin rəhbəri Teymur Kuseba bildirib.

Qeyd edək ki, 2022-ci ilin may ayından etibarən Azərbaycan Qızıl Aypara Cəmiyyəti əməliyyatları asanlaşdırmaq məqsədilə həmçinin "Microsoft" ilə əməkdaşlığa başlayıb.

Qeyd edək ki, cəmiyyət tərəfindən göstərilən humanitar xidmətlər və hüquqi hərəkətlərin rəqəmsallaşdırılması məqsədi ilə yaradılmış "YARDIM.ET" adlı İanə İdarəetmə Sistemi fəaliyyət göstərir. Bu sistem çərçivəsində HÖP, ASAN PAY, SMS, MilliÖn, eManat, hesab.az, bank kartı və s. kimi vasitələrlə ianələrin toplanması və idarəolunması həyata keçirilir. Toplanmış ianələr ehtiyaclı insanlara müvafiq humanitar yardımların edilməsinə yönləndirilir və heç bir kommersiya və gəlir məqsədi daşımır.

Korporativ sosial məsuliyyəti həyata keçirən bütün şirkətlər və təşkilatlar, o cümlədən fərdi sahibkarlar və xeyriyyəçilər Azərbaycan Qızıl Aypara Cəmiyyəti ilə əməkdaşlıq etmək üçün bu ünvana müraciət edə bilərlər: [email protected]