Bakının Binəqədi rayonunda 1979-cu il təvəlüdlü Aydın Babayev sevgi münasibətində olduğu Pərvanənin (adlar şərtidir - red.) evindən oğurluq edib.
Milli.Az xəbər verir ki, bizim.media-nın əldə etdiyi məlumata görə, Aydın evin dəhlizindəki paltar dolabına qoyulmuş əl çantasının içərisində olan pul qabıdan 3400 ABŞ dolları və 1600 manat məbləğində nağd pulu oğurlayıb.
İstintaq orqanı tərəfindən Aydın barəsində Cinayət Məcəlləsinin 177.2.4-cü (xeyli miqdarda ziyan vurmaqla oğurluq etmək) maddəsi ilə ittiham elan edilib.
Cinayət işi baxılması üçün Binəqədi rayon Məhkəməsinə göndərilib. İş hakim Mahirə Kərimovanın sədrliyi ilə araşdırılıb.
Məhkəmədə ifadə verən Aydın ona elan olunmuş ittiham üzrə özünü təqsirli bilib. O bildirib ki, Bakı şəhərində yerləşən "SİMPATY" adlanan gecə klubunda bir xanımla tanış olub:
"Həmin xanım özünü mənə Pərvanə kimi təqdim etdi. Mən isə özümü ilk öncə Ramil kimi təqdim etdim. Bir müddət keçdikdən sonra əsil adımı Pərvanəyə bildirdim. Biri-birimiz ilə münasibət qurmağa başladıq. Münasibətlərimiz qeyri-rəsmi ailə münasibətinə çevrildi. Pərvanənin əvvəllər kirayədə yaşadığı evdə cəmi iki dəfə olmuşam".
Təqsirləndirilən şəxsin sözlərinə görə, sonuncu dəfə Pərvanə evdə yemək süfrəsi açıb:
"Həmin süfrəyə Pərvanə rəfiqəsi Səliməni də dəvət etmişdi. Evdə bir qədər yeyib-içdikdən sonra Pərvanə evdə spirtli içki olan "Viski"nin də olduğunu bildirdi. Ona həmin içkidən dadmaq istədiyimi dedim. Səlimə isə buna etiraz etdi və içkiləri qarışdırmaq istəmədiyini bildirdi. Pərvanə "Viski"ni gətirdi. Həmin içkini onunla içməyə başladım".
Aydın qeyd edib ki, bundan sonra birlikdə "SİMPATY" gecə klubuna getməyi təklif edib:
"Razılaşdıqdan sonra birlikdə kluba getdik. Klubda yenə də spirtli içki sifariş etdim, Pərvanə ilə araq içməyə başladıq. Bir müddət keçdikdən sonra Səlimə klubda özünü yaxşı hiss etmədiyini və evə getmək istədiyini bildirdi. Bu səbəbdən kluba olan hesabı ödəmək üçün Pərvanə durdu və əl çantasından pulqabını açdıqda içərisində olan pulları gördüm.
Lakin, Pərvanəyə klubda hesabı verməyə qoymadım və 35 manat məbləğində hesabı özüm ödədim. Sonra taksi ilə ilkin olaraq Səliməni yaşadığı evinə apardıq, sonra isə Pərvanə ilə birlikdə onun həmin dövrdə yaşadığı evə getdik. Evə daxil olduqdan sonra Pərvanənin əl çantasını dəhlizdə olan dolabın içinə qoyduğunu gördüm. Sonra Pərvanə yataq otağında yerinə uzandı, hər ikimiz sərxoş olduğumuzdan dərhal yuxuya getdik".
Təqsirləndirilən şəxs bildirib ki, səhəri gün, saat 10 radələrində yuxudan oyandıqdan sonra əynini geyinib və yataq otağından dəhlizə keçib:
"Dəhlizdə olan dolabın içərisində gödəkcənin altından Lamiyəyə məxsus əl çantasından 3400 dollar, 1600 manatını götürdüm".
Aydın deyib ki, oğurladığı pulların bir qismini xərcləyib, qalan 700 dollar və 500 manat məbləğində pulu isə polis əməkdaşlarına saxlanılan zaman könüllü olaraq təhvil verib. O, himayəsində 1 az yaşlı uşağının olmasını, peşman olmasının nəzərə alınmasını istəyib.
Zərərçəkmiş Pərvanənin sözlərinə görə, gecə klubunda tanış olduğu Aydınla gələcəkdə ailə quracağına inanıb, bu səbəbdən onunla qeyri-rəsmi münasibətdə yaşamağa başlayıb. O bildirib ki, evindən oğurluq edilməsi ilə bağlı Daxili İşlər Nazirliyinin 102 xidmətinə müraciət edib. Pərvanə qeyd edib ki, sonradan Aydınla barışıb, Aydının ona vurduğu ziyanı tam ödəyib. O, Aydından şikayətçi olmadığını deyib.
Məhkəmənin hökmü ilə Aydın 2 il 2 ay müddətinə azadlığın məhdudlaşdırılması cəzasına məhkum olunub. Onun üzərinə yaşadığı evi axşam saat 23.00-dan növbəti gün, səhər saat 06.00-dək tərk etməmək, elektron nəzarət vasitəsini gəzdirmək, həmin vasitənin işlək vəziyyətdə saxlanılması üçün ona xidmət etmək, yaşadığı Bakı şəhərinin hüdudlarını tərk etməmək, müvafiq məhkəmə qərarı olmadan yaşayış yerini dəyişdirməmək vəzifələri qoyulub.
Aydının barəsində seçilmiş həbs qətimkan tədbiri dəyişdirilib. Məhkəmə onun barəsində başqa yerə getməmək haqqında iltizam qətimkan tədbiri seçib. O, məhkəmə zalından həbsdən azad edilib.
Milli.Az