Tarix-memarlıq abidəsini restoran kimi işlədənlər cəzalandırılacaq - RƏSMİ

22 Noyabr 2022 17:17

Sosial şəbəkələrdə yayılan görüntülərdə Mərdanov Qardaşları küçəsində restoranın fəaliyyət göstərdiyi tarixi-memarlıq abidəsinə qeyri-qanuni dəyişiklik edilib.

Məsələ ilə bağlı Mədəniyyət Nazirliyi yanında Mədəni irisin Qorunması, İnkişafı və Bərpası üzrə Dövlət Xidməti mətbuat xidmətinin rəhbəri Fariz Hüseynov Trend-ə təsdiq edib ki, bir müddət öncə Mərdanov Qardaşları 20 ünvanında yerləşən, tarix-memarlıq abidəsi (inv. 2950) olan binaya müdaxilə edilib.

"Bununla bağlı Mədəniyyət Nazirliyi yanında Mədəni irisin Qorunması, İnkişafı və Bərpası üzrə Dövlət Xidməti tərəfindən baş vermiş müdaxilə faktının araşdırılması və aradan qaldırılması üçün tədbirlər görüldü. Həmin müdaxilə faktı aradan qaldırılsa da, obyekt sahibi tərəfindən qanun pozuntusu təkrar törədilib.

Baş vermiş hadisənin aradan qaldırılması və qanun pozuntusuna yol vermiş şəxslərin cəzalandırılması üçün hüquq mühafizə orqanları ilə birgə iş aparılır", - deyə F.Hüseynov qeyd edib.

Milli.Az