Gələn il də pensiyaların sığorta hissəsi 15 % artacaq

22 Noyabr 2022 10:30

"Pensiyaların sığorta hissəsinin artımı öncəki ildəki orta aylıq əməkhaqqının artımına bağlıdır. Azərbaycanda bu il orta aylıq əməkhaqqı 14,5 % artıb. İlin sonuna bu yəqin ki, 15 %-ə çatar. Bu hesabla gələn il də bütün pensiyaların sığorta hissəsi 15% artacaq".

Milli.Az bildirir ki, bunu APA-ya açıqlamasında Milli Məclisin Əmək və sosial siyasət komitəsinin sədri Musa Quliyev deyib.

Musa Quliyev bildirib ki, bütün ölkə üzrə bu artım hər bir pensiyaçıya şamil olunacaq: "Eyni zamanda Milli Məclisdə biz komitə olaraq təklif də verdik ki, yaşayış minimumu və ehtiyac meyarının məbləğinin xeyli artırılmasına görə pensiyanın da minimum həddi artırılsın. Çünki yaşayış minimumu və ehtiyac meyarının məbləğində olan artım bunu tələb edir. Hökumətdən də xahiş etdik ki, bu məsələyə baxsın. Ola bilsin ki, pensiyaların minimum məbləğinin də artırılması ilə bağlı qərar olsun. Bu təklifimizə yəqin ki, müsbət cavab olar. Bizim bu təklifimizə hökumətin münasibəti müsbətdir".

Milli.Az