"Kəpəz"in kapitanı Əli Səmədov Azərbaycan Premyer Liqasının 7-ci turunda "Şamaxı" üzərindəki qələbə (2:1) ilə bağlı klubun mətbuat xidmətinə açıqlama verib.
O deyib: "İyuna yaxşı hazırlaşmışdıq, həftə ərzində çalışdırıcımız Tərlan Əhmədov tərəfindən verilən tapşırıqları maksimum şəkildə yerinə yetirməyə çalışmışdıq. Bütün məşq prosesi üç xal hədəfi üzərində qurulmuşdu. Matçdan əvvəl baş məşqçimiz də bildirmişdi ki, yalnız qələbə üçün meydana çıxacağıq. Doğrudan da bizə qalib gəlmək mütləq lazım idi. Çünki vəziyyətimiz yaxşı deyildi. Ardıcıl oyunlarda uduzmuşduq. Əlimizdən gələni etməliydik ki, qələbə qazanaq. Şükürlər olsun ki, qarşıya qoyulan məqsədə də çatdıq. Açığı, birinci hissədə hesabda geriyə düşsək də, inamımız azalmadı".
Ə.Səmədov bildirib ki, fasilədə baş məşqçi də onlardan ruhdan düşməməklərini istəyib: "Bildirdi ki, oyunu xilas edə bilərik. Uşaqlarda özünəinam hissini aşıladı. Nəticəsi də məlumdur. Tez toparlanıb əvvəlcə hesabı bərabərləşdirdik, daha sonra önə keçdik. Nümayiş etdirdiyimiz oyunla da göstəririk ki, əvvələ baxanda komandada çox irəliləyiş var. Mən şəxsən belə düşünürəm. Tərlan müəllimin rəhbərliyi altında daha uğurlu nəticələr qazanacağıq. Sevincliyik, uzun müddətdən sonra nəhayət ki, qalib gəlməyi bacardıq. İnşallah, bunun ardı gələcək. Qələbələrin davamlı olması üçün əlimizdən nə gəlirsə, edəcəyik".
Milli.Az