Ermənilərin Qarabağda fəallaşmasının PƏRDƏARXASI - Bu ölkələr dəstək verir ...

4 Avqust 2022 17:22

"Ermənilərin Qarabağda yerləşən qeyri-qanuni silahlı dəstələri tərəfindən ayın 2-dən Azərbaycanın mövqeləri istiqamətində təxribat atəşləri nəticəsində bir əsgərimiz şəhid oldu".

Bunu Milli.Az-a açıqlamasında hərbi-siyasi ekspert, ermənişünast Telman Qasımov deyib.

O bildirib ki, Laçın dəhlizinə alternativ yolda Azərbaycan postları olacaq:

"Burada sual yaranır ki, ermənilər nə üçün belə azğınlaşıblar? Bunun bir neçə səbəbləri var. Birinci səbəblərindən biri odur ki, Ermənistanın Təhlükəsizlk Şurasının katibi Armen Qriqoryan bir müddət öncə müsahibə verərək bildirmişdi ki, sentyabrın 1-dən artıq Qarabağda xidmət edən Ermənistan vətəndaşlarının hərbiçiləri birdəfəlik Qarabağı tərk edəcəklər və bundan sonra artıq Qarabağa Ermənistandan hərbçi və əsgərlərin çağırışı dayandırılacaq.

Daha doğrusu, 2020-ci ildən sonra güya köməyə gedən həmin o qüvvələrdir ki, bu günə qədər orada qalıbdır. Təbii ki, bu da ilk növbədə dezinformasiyadır. Çünki bu konflikt yaranandan daim Ermənistan vətəndaşları Qarabağda xidmətdə olublar, oarada yaşamağa köçürülüblər. Ona görə də Armen Qriqoryanın dedikləri növbəti yalandan başqa bir şey deyil.

Onlar 2020-ci ildə ora gedənlər deyil, illər ərzində orada qalmış, xidmət keçmiş Ermənistan vətəndaşlarıdır, hətta onların içində xarici vətəndaşlar da var. Qriqoryanın qeyri-qanuni silahlıların sentyabrdan Qarabağdan çıxarılması ilə bağlı yaxçı-pis nəsə deyir, amma oradakı Ermənistan ordusuna məxsus silah-sursat, hərbi texnika barədə heçnə demir. Halbuki o hərbi texnikalar indi qondarma rejimin "ordusunun" ixtiyarındadır. 

Qeyri-qanuni erməni silahlılarının Qarabağdan çıxarılması məsələsi başlamalı idi. Çünki avqustun 2-si Qarabağda postlarda olan həmin o erməni silahlılarını tələmtələsik postlardan aşağı endiriblər və avtobuslara doldurub, Ermənistana daşıyıblar. Onları  Azərbaycan ərazisindən çıxardıblar. 

10 noyabr üçtərəfli bəyanata görə Laçın dəhlizi bağlanmalı, yeni alternativ yol açılmalı idi ki, Ermənistandan ermənilər Xankəndinə həmin yolla gedib gəlsinlər. Azərbaycan artıq o yolu bitirmək üzrədir, amma Ermənistan tərəfi hələ avqustun 1-dən bu yolun öz tərəflərindəki hissəsində - Zəngəzurun Xarinzor adlandırdıqları kəndindən işləri görməyə başlayıblar. 

O yol açılacağı təqdirdə Azərbaycan postları qurulacaq. Bu da bir tərəfdən erməniləri qıcıqlandırır ki, artıq onlar əvvəlki kimi özbaşına bu yoldan istifadə edə bilməyəcəklər. Mütləq şəkildə Azərbaycanın o keçid məntəqələrindən istifadə edəcəklər. Ona görə də dünənki məhz o proseslər, üstəlikdə ki, Xarinzordakı başlanan yol tikinti işləri revanşistləri qıcıqlandırdı və təxribatlara əl atmağa başladılar.

Təbii ki, burada təkcə o revanşistlər deyil, onlara dəstək olan qüvvələr, ölkələr var. Həmin o Zəngəzur dəhlizinin açılması həm Hindistan, həm İran, üstəlikdə Qərb üçün maraqlı deyil. Çünki burada onlar ən çox Rusiyanın qazanacağını, bu yoldan Rusiyanın fayda götürəcəyini nəzərə alıb, həmin o yolun açılmasının əleyhinədirlər. Ona görə də onların dəstəyi və revanşistlərin əli ilə bu cür təxribatlar baş verir".

Təhməz Əsədov
Milli.Az