Avropa kömürə keçmək üçün təcili planlar təqdim edir

21 İyun 2022 23:52

Avropa ölkələri təbii qaz tədarükünün məhdudlaşdırılmasına səbəb ola biləcək və kömürlə işləyən enerji mənbələrinə qayıtmaq siqnalı verən fövqəladə planlar hazırlayıb.

Milli.Az oxu.az-a istinadən bildirir ki, Niderland və Danimarka elektrik enerjisinin kəsilməsi ilə bağlı fövqəladə vəziyyət planları üzərində işlədiklərini bildiriblər.

İtaliya enerji sektorunda yüksək xəbərdarlıq rejimi elan etməyi düşünür. Fövqəladə hallar yaranan zaman İtaliya sənaye obyektləri arasında qaz tədarükünü müəyyən normaya sala bilər.

Almaniya və Avstriya isə artıq qazın məhdudlaşdırılmasına səbəb ola biləcək fövqəladə vəziyyət planlarını işə salıblar.

Xatırladaq ki, Rusiyanın "Qazprom" şirkəti Ukraynadakı müharibə ilə əlaqədar sanksiyalar nəticəsində Kanadada avadanlıqların gecikməsini əsas gətirərək, keçən həftədən etibarən "Şimal axını" qaz kəməri ilə Almaniyaya təbii qaz tədarükünü yarıdan çox azaldıb.

Yeri gəlmişkən, xatırladaq ki, Avropa Rusiya qazından asılılığı azaltmaq üçün gözünü Türkmənistan qazına dikib: Mavi yanacağın Azərbaycan üzərindən nəqli nəzərdə tutulur.

İtaliyanın ekoloji keçid məsələləri üzrə nazir müavini Vannia Qava isə Cənub Qaz Dəhlizinin (SGC) İtaliya və Avropa üçün son dərəcə əhəmiyyətli olduğunu bildirib.

Milli.Az